Agerraldia egitasmoaren bidez eta ErriGora kanpainarekin iritsitako ekarpenei esker eskaini ahal izango dituzte ludoteka zerbitzuok Nafarroa erdialdeko eta hegoaldeko hemezortzi herritan.

Iaz hamahiru herritan egin zuten eskaintza, eta aurten hemezortzi izango dira. Oraindik matrikulazioa guztiz itxita ez badago ere, 280 haur baino gehiago daude dagoeneko izena emanda.

Aste honetan egin dute Agerraldiak osatu duen ludoteken eskaintzaren aurkezpena Tafallan. Ene Kantak-en laguntzaz Tafallako ikastolako eta sare publikoko D ereduko ikasleak batu eta elkarrekin egin dute dantza.

Euskarazko ludoteka zerbitzuari esker eskolako hormetatik harago, aisialdian ere euskaraz aritzeko espazioak izango dituzte Nafarroako erdialdeko eta hegoaldeko hainbat neska-mutikok.

ErriGora saskiak erosteko azken egunak

Gaur amaitzen da ErriGora kanpainako saskiak eskatzeko epea. Nafarroako produktuekin osaturiko hiru saski-eredu daude aukeran, eta bildutako diruaren %25 Nafarroa erdialdeko eta hegoaldeko euskara sustatzera bideratuko da.

Herrigintza eta auzolan ariketa handia da ErriGora. 2013a ezkero, 1.400.000 euro baino gehiago bideratu dira euskara sustatzera. AEK, Ikastolen Elkartea, Sortzen Elkartea eta Agerraldia ekimena dira bidelagun nagusiak. Saski eskaerak online ere egin daitezke. Adi, azken orduak dira-eta!