Arrasate: Freskura
Urtero bezala, uztailean Freskura egitasmoa jarriko dugu martxan Txatxilipurdi elkarteak eta Arrasateko euskara sailak elkarlanean. Covid garaiak eta neurriak alde batera utzita, Musakolako igerilekura itzuliko da egitasmoa.
Uztailaren 1etik 29ra arratsaldeko 16:00etatik 20:00etara euskarazko irakurgaiak, mahai jolasak eta jolaserako elementuak maileguan hartzeko aukera izango da igerilekuan. Honekin, euskaraz dauden hainbat produkturen ezagutza eta erabilera sustatu nahi dugu.
Aurtengoan Freskuraren bigarren adar bat ere izango da herrian: igerilekuko eskaintzaz gain, familiei zuzendutako aisialdi eskaintza ere izango da asteartetan, Monterron parkean, arratsaldeko 18:00etan. Hona hemen izango diren tailerrak:
Uztailak 5: sormen txokoa
Uztailak 12: Jolas-Molas
Uztailak 19: naturan jolasean
Uztailak 26: zirko tailerra
Adin tarte guztientzako eskaintza da Freskura, haur, nerabe eta helduei hainbat jardueraren bitartez (jolastuz, irakurriz eta tailerretan parte hartuz) euskaraz ongi pasatzeko aukera eskaini nahi diegu parkean edo igerilekuan dauden momentuan, uztailean ere euskaraz jolasteko irakurtzeko eta gozatzeko aukera badagoela erakusteko.
Uztaileko arratsaldetan euskaraz gozatzeko aukera paregabea da Freskura!
Hurbildu igerilekuko txokora, eta gozatu euskaraz.
Ez dadin euskara lehortu, zure eskura… Freskura!
Iruzkinik ez "Arrasate: Freskura"