Tabakalera, Donosti: Situ-akzioak. Emma Kunz

Situ-akzioak zentzumenak aktibatu, arteaz gozatu, ikasi eta esperimentatzeko gunea da. Diseinua familiekin elkarlanean eta prozesu partehartzaile batean sortu da, elkarrekin eraiki, eraldatu eta zentzumenek gidatuta, jolasteko espazioa sortzeko helburuarekin.

Proiektuak Emma Kunz (Suitza, 1892-1963) sendalari eta ikerlariaren obra eta lan-metodoa hartzen ditu abiapuntutzat. Kunzek marrazkia erabili zuen beragana hurbiltzen zen jendea sendatzeko eta, beti bere penduluak lagunduta, pertsona bakoitzaren energia-eremuak irakurri eta diagrama geometrikoak burutzen zituen ondoren.

Esperimentaziorako paisaia honetan, forma geometriko anitzak eta koloretsuak aurkituko ditugu; baita naturari, medikuntzari eta botanikari egindako erreferentziak ere. Bestalde, armiarma sareen gisa, artistaren marrazkiak hiru dimentsioetara hedatuko dira koloretako harien bitartez.

Zentzumen desberdinak aktibatzen dituzten elementuekin, materialekin eta ehundura anitzekin, espazioan mugitzeko eta esperimentatzeko moduak asko dira: mendi-maldatik biraka jaitsi, penduluetan  kulunkatu, kobazulo batean barneratu eta bertako soinuak entzun…

Situ-akzioak. Emma Kunz Juntura arkitektura, espazioak eta prozesuak kooperatibarekin elkarlanean sortu da.

*Maiatzean eta ekainean eskolentzako saioak eskainiko dira goizez. Informazio gehiago: hezkuntza@tabakalera.eus