Familia eta lana bateratzeko Jaurlaritzaren dekretu proposamen berriak askotariko iritziak eragin ditu

Eusko Jaurlairtzak 31,37 milioi euro bideratuko ditu familia eta lana bateratzeko politiketarako. Datorren urterako egongo da indarrean Jaurlaritza prestatzen ari den dekretu berria, eta emandako datuen arabera 2014arekin alderatuta %81,13 haziko dira laguntzok. Beste aldaketa bat: errentaren araberakoak izango dira datorren urtetik aurrera Euskal Autonomia Erkidegoan seme-alabengatik emandako laguntza guztiak.

Zahartzen doa EAEko gizartea. Emandako datuen arabera kalkulatzen da 2020. urtean biztanleen %25 izango dela 65 urtetik gorakoa.

Irizpidea, errenta

Enplegu sailburu Miguel Toñak asteon eman du Jaurlaritzaren asmoen berri. Dekretu berriak familiei zuzendutako hiru jarduera lerro aurreikusten ditu, eta bigarren seme-alaba izatea sustatuko du. Hala, 20.000 eurotik beherako errenta duten familiei %20 handituko zaie laguntza (1.500 eurotik 1.800 euro ingurura), eta %33 eta %46 artean txikituko zaie errenta handiagoa duten familiei (1.500 eurotik 800 euro ingurura).

Hirugarren seme-alabagatik laguntza berdina jasoko dute 20.000 euro arteko errenta duten familiei: 6.300 euro zazpi urtean. Gainerako errenta tarteko familiei, ordea, %44 eta %56 artean txikituko zaie.

Hauek dira laguntzei dagokienean Jaurlaritzak ezarritako hiru jarduera lerroak:

. seme-alabak zaintzeko eszedentzia edo lanaldi murrizketa eskatzeko. 2014an, 13.515 lagunek (horietatik batzuk 2013koak izan ziren) jaso zituzten haurrak zaintzeko laguntzok. Horietatik 1.850 lagunek eszedentzia eskatu zuten, eta, 11.665 lagunek, lanaldi murrizketa. Jasotako laguntza 1.243,36 eurokoa izan zen batez beste.

. mendekotasun egoeran edo osasun egoera larrian dauden senitartekoak zaintzeko eszedentzia edo lanaldi murrizketa eskatzeko. 2014n, 280 lagunek jaso zituzten laguntzok, batez beste 1.246,48 euro. Horietatik 30 lagunek eszedentzia eskatu zuten, eta, 250 lagunek, lanaldi murrizketa

. seme-alabak zaintzeko langileak kontratatzeko. Enplegatzaileari Gizarte Segurantzako kostuak ordaintzeko laguntza ematen zaio, betiere familia unitatearen errentaren arabera. 2014n, 313 lagunek jaso zituzten laguntzok, batez beste 525,55 euro.

2014ko ordainketak

Eusko Jaurlaritzak 31,3 milioi euro bideratuko ditu familia eta lana bateratzeko politiketarako, baina 21,4 milioi euro inguru 2014ean ordaindu gabe utzitako laguntzak ordaintzera bideratuko dituzte —martxoan amaitu ziren dirua—. Hala, Jaurlaritzak 10 milioi euro izango ditu eskaera berriei erantzuteko. Toñak aurreikusten du kopuru horrekin apirilera arteko eskaerak erantzun ahal izango dituztela. Aurrerago beste diru sail bat onartzea da asmoa.

Erreakzioak

Dekretu berriarekin Eusko Jaurlaritzak murrizketak ezartzen dituela salatu dute, besteak beste, EH Bilduk eta alderdi popularrak. Diote erdi mailako errentek pairatuko dutela murrizketa, gizartearen zati handienak, alegia. Zalantzan jartzen dute, baita ere, laguntzen banaketa egiteko irizpidea familien errenta izatea.

Gaiak laguntza publikoen politika ekarri du, berriz ere, mahai gainera. Beharrezkoa da jaiotze tasa bultzatzea? Laguntza publikoen bitartez sustatu behar da jaiotze tasa? Soilik diruz emandako laguntzekin lortzen da hori? Edo eraginkorragoak lirateke haurrak hezten lagunduko duten bestelako baliabide batzuk, esaterako gizarte zerbitzu orokorragoak edo familia eta lana bateratzeko neurriak edo…

Argazkiaren iturria hemen.