Murgildu Aralarren eta bizi esperientzia espeleologiko txiki bat familian

Lizarrustiko parketxetik abiatuta, poliki-poliki Aralarko erraietara eramango gaituen bideari ekingo diogu. Paseatzeko leku ezin aproposagoa da garai batean animaliek tiratutako bagoneta bat ibiltzen zen bide lau honetan. Pagadi zabala, bidezidor atsegina, erreka, arroila eta txondor plazaren bat aurkituko ditugu bidean. Eta, azkenik, Lareo urtegiko ingurune ederretara helduko gara.

Handik gertu, zailtasunik gabeko espeleologia esperientzia bat bizitzeko aukera izango dugu, hagin baten azpian kokatzen den Lareoko kobazuloan barneratuko garelarik. Aspaldi gure mendiotan bizi izandako gizakien azalean jarri ahal izango gara estalaktitaz eta estalagmitaz inguratuta gauden bitartean. Kobetako giroa oso berezia da, hezetasun altua eta tenperatura egonkorra dute urte osoan zehar; honi esker sabaitik erortzen den urak egitura bereziak sortzen ditu.

Lur azpiko altxor hauek ezagutzeko, Aralarko parketxeak plan eder hau proposatzen dizu familian edo lagun artean egiteko. Hitzordua apirilaren 13an izango da, igandearekin, goizeko 10:00etan.

Izena ematea derrigorrezkoa izango da.

INFORMAZIO GEHIAGORAKO ETA IZENA EMATEKO:

lizarrusti@gipuzkoanatura.eus / barandiaran@gipuzkoanatura.eus

943 180335 / 688 895 069

www.gipuzkoanatura.eus

NATURAREKIN OREKAN Bisita gidatua Iztueta baserrira

Iztueta Baserrian esnetan bizi dira. Belaunaldietako esperientzia dute esne behiekin lan egiten. Artisauen jakintza eta gaur egungo teknologiak uztartuz egiten dute lan eta, jasangarritasuna ardatz harturik, beraien egiteko moduak erakutsi nahi dizkigute. Ziklo guztiaz arduratzen dira, beren produktuetan kalitate gorena bermatzeko. Iztuetan oso barneratuta dute behiak direla proiektu honen ardatz nagusia; behiek eskaintzen dieten esnea da euren sorkuntza guztien oinarria eta, esnea goi mailakoa izateko, behiak ere halakoak izan behar dute, beraz, euren zaintza egokian oinarritzen da lanaren parte handi bat.

Familian igande goiz eder bat pasatzeko proposamena luzatzen dizuegu, beraz, Gipuzkoako Parketxe Sarea Fundazioak eta Iztueta Baserriak antolatuta, apirilean ere.

Iztueta Baserriak bere abereak, ukuilua, zelaiak, esnetegia eta baserria erakutsi nahi dizkie apirilaren 13an jarduerara bertaratzen diren bisitari guztiei. Baserriko bizimodua ezagutzeaz gain ekoizten dituzten kalitate handiko produktuak dastatzeko aukera izango dute bisitariek, eta, bide batez, inguruko paisaia paregabeaz gozatzekoa.

Hitzordua goizeko 11:00etan izango da baserrian bertan eta 2 orduko iraupena izango duen bisita egingo da. Helduek 12€ ordaindu beharko dituzte eta 6€ haurrek.

Aurrez izena ematea ezinbestekoa da, Aralarko parketxearekin harremanetan jarriz 943 18 03 35 / 688 895 069 telefonoen bidez edota korreo bat idatziz barandiaran@gipuzkoanatura.eus helbidera.

Ez galdu aukera hau eta zatozte gurera!