Familian egiteko plana: Izarraitzeko mendilerroa

Gaurko honetan Izarraitz mendilerroan egiteko txango bat proposatu nahi dizuegu. Aittola (Azkoitia) aparkaleku eta piknik-gunetik Xoxote mendira joateko ibilbidea aurkeztuko dizuegu datozen lerroetan. Txango honen joan-etorria 7 kilometro ingurukoa da, haurrekin egiteko primerakoa.

Gaurko proposamena, beraz, Azkoitiko Aittolako aparkalekutik hasten da. Izarraitz mendikateko informazio kartelaren ondoren, zuhaitz artean sartuko gara eta pista zabalago batekin bat egingo dugu. Pista nagusi hori jarraituz, Xoxote, Erlo nahiz Kakute mendietako bidea seinalatzen duen kartela ikusiko dugu.

Aldapa bukaeran, zuhaitz artetik aterata, begiratokia dago, eta bertatik ikus daitezke Kantauri itsasoa eta euskal kostaldea. Bide harritsu bat ikusiko dugu begiratokitik aurrera eta hari jarraituko diogu, eroritako borda baten ondotik pasako gara. Belarretan gora, lurrezko bidea hartuko dugu. Sakon batean, borda eta putzua ikusiko ditugu. Eskuinean, Kakuteko gurutzea utzi eta Izkiturriren ondotik —ura erateko iturri aparta— Zamaleku lepora joango gara.

Xoxotera joateko aukera

Zamalekuan Erloko antenara doan pistarekin bat egingo dugu, eta metro gutxira, eskuinetara, Xoxote seinalatzen duen kartelari jarraituko diogu. Artzain borda batzuen ondotik igaro eta malda bat igo ondoren, Xoxoteko aterpera iritsiko gara. Eskuinean aurkituko dugu, Loiolako Inazio Deunaren monumentua, baita, antena batzuen ondoan, Xoxoteko gurutzea ere.

Erlora joateko aukera

Ibilbide luzeagoa egin nahi izanez gero, Zamalekutik gora hartuta, eskuinera, Xoxote aldera joan beharrean, pista jarraitu dezakegu. Goraka igota, eskuin aldean, Erloko gurutzera joan ahal izango dugu. Amaiera, harritsua dauka honek (gogorragoa da). Pista aurrera jarraituta, berriz, Erloko antenara iritsiko gara —pasiera lasaiagoa da honako hau—.

Behin Erlora igota, zuzenean, Xoxoteko aterpetxera jaitsi daiteke bi mendien artean dagoen putzua, ezkerrean utzita.