Ulertzea nekeza zen. Etxean batera bizi den familia ezin zen orain arte elkarrekin paseatzera irten. Guraso bakar batekin irten behar zuten umeek.

Arau hori aldatu egingo du bihartik aurrera, maiatzak 11. Eusko Jaurlaritzak jakinarazi du konfinamenduaren deseskalatzearen 1 fasean baimenduta egongo dela elkarrekin bizi den familia nukleoa elkarrekin ateratzea paseoan egitera. Konfinamendua arintzeko Euskal Autonomia Erkidegoan onartu diren neurri berrietako bat da.

Hala, EAEn, bi gurasoek ume bakarrarekin ateratzeko aukera izango dute eta herri barruko kilometro bateko muga ezabatu egingo da. Hori bai, udalerri berean bakarrik ibili ahalko dira EAEko biztanleak, eta 5.000 biztanletik gorako herrietan eta hirietan ezarritako ordutegia errespetatu beharko dituzte.

Nafarroan ez

Nafarroan eta 1 fasean sartu diren gainontzeko lurraldeetan, orain arte bezala jarraituko dute: heldu batek hiru umera arte atera ahal izango ditu kalera eta gehienez kilometro bateko mugan ibili.

Autoan elkarrekin

Etxebizitza berean bizi diren pertsonak, bestalde, auto berdina erabiltzeko aukera izango dute 1 fasean; izan ere, bederatzi plazarainoko autoa parteka dezakete.

Argazkiaren iturria: Jakob Owens.