Euskararen Eguna izan da aste honetan, eta euskara familian sustatzeko egitasmo batekin gatoz oraingoan: FamiliaOla. Hezten aisialdi elkarte hezitzaile euskaltzaleak sortu du, eta familiak euskaraz aritzeko gune eta uneak sortzea du xede. Gune hauetan “euskaraz ikasten ari diren edota euskaraz aritzeko zailtasunak dituzten familiak” eta euskaraz bizi diren familiak elkartu nahi ditu ekimenak.

2013. urteaz geroztik dago martxan dinamika hori Irunen, udalaren eskutik. Otsaila, maiatza eta azaroan hianbat ekintza antolatzen dituzte urtero. Aurtengo azaroan, esate baterako, txotxongilo kontakizuna eta yoga tailerra egin dituzte, eta Arditurrira txango bat ere antolatu dute.

Egitasmoaren bidez, haurrentzat zein gurasoentzat “erakargarriak” diren jarduerak egiten dira, beti ere familiek euskaraz aritzeko konpromisoa hartuta. Modu horretan, mintzaguneak bilakatzen dira eremu horiek. Era guztietako tailerrak egiten dituzte: jolasak, kantak, ipuinak, eskulanak, kirola…