Familientzako plana: MONJARDIN EDO DEIOKO GAZTELUA (890 m) (Villamayor de Monjardin – Nafarroa)

Zailtasuna: erraza / Iraupena: 45 min. (joan) / Ibilbidea: 2 km inguru / Goibehea: 208 metro.

Bi kilometroko igoera polita egin daiteke Lizarraldean dagoen Monjardin gaztelua ikustera. Villamayor de Monjardin herria dugu abiapuntu. Herriko frontoiaren ondoan dagoen Ilargia tabernan eskatuko dugu gazteluan sartzeko giltza eta gorantz abiatuko gara. Ez du galbiderik, eta gaztelua begi bistan izango dugu ia ibilbide osoan. Hori bai, itzal gutxiko bidea da.

Gazteluaren inguruko azalpen laburra emango digu atarian dagoen informazio panelak, gazteleraz. Erromatarrek eraikia, musulmanen gotorleku izana eta Pamplonako errege Antxo Garcesek bere egina izan zela diote historialariek.

Erdi Aroko gazteluaren horma zatiak aurkituko ditugu, baita euri-urak jasotzeko antzinako biltegia ere. Gazteluaren buelta guztian bista zoragarriak daude. Karlisten gotorlekua ere izan zen Deio. Gaur egun, Esteban deunaren omenezko ermita dago bertan. Bi meza egiten dira urtean; erromeriak dira maiatzaren 1ean eta herriko jaietan (irailean).