Familientzako plana: OIELEKUKO CROMLECHA (Oiartzun – Gipuzkoa)

Zailtasuna: erraza / Iraupena: 1:15 ordu. / Ibilbidea: 4 km / Goibehea: 60 m.

Burdin Aroko hileta-monumentuak dira cromlechak, eta Oiartzunen 57 monumentu megalitiko daude. Guztien artean ikusgarriena bereziki ongi kontserbatua dagoelako Ipar Oielekuko cromlecha da.

Ibilbide zirkularra da proposatzen duguna. Bertara iristeko Oiartzun herria eta Artikutza lotzen dituen GI-3631 errepidea hartuko dugu eta Kauso izeneko parajean dagoen aparkalekuan utziko dugu autoa.

Kausotik abiatzen den ibilbidea pinu, izei eta pago artean egingo dugu. Hego Oielekura iritsi gara lehenengo. Atseden lekua da, egurrez mahaiekin, iturriarekin eta azalpen-panelekin. Borda txiki bat ere aurkituko dugu bertan.

Ipar Oielekuko cromlecha apur bat aurrera eginda aurkituko dugu. Hamar metro diametroko zirkulua osatzen duten eta biribilean ezarritako harri horiek Aiako Harriaren gailurra dute atzean. Itzuleran, Oielekuko atseden gunera iritsiko gara berriz, eta ibiblide zirkularrak Munerre, Kauso I eta Kauso II cromlechak ikustera eramango gaitu.

Bada motzagoa den beste ibilbide bat (3 km / 45 min.). Kausoko aparkalekua atzean utzi eta aurrera egingo dugu GI-3631 errepidean. Munerreko aparkalekutik abiatuko gara. Kasu honetan ez ditugu Kausoko cromlechak ikusiko.