2025eko lehen edizioaren arrakastaren ondoren, Familion egonaldi ibiltariak 2026an errepikatuko du esperientzia, proposamen berritu eta aberastu batekin.

Ekimenaren berri izateko Esther Lakasta (Dindaia Fundazioa) eta Maddi Bordagarairekin (Uda Leku) egin dugu hitzordua.

Bi aste, 30 familia, Euskal Herriko hainbat txoko eta euskaraz bizitzeko hamaika aukera. Horrela laburbil daiteke 2025eko apirilean lehen aldiz antolatu zuten Euskal Herri mailako familia egonaldi ibiltariaren esperientzia. AEK, UDA LEKU, DINDAIA eta EBETE elkarteetako lagunek elkarlanean abiatutako proiektu pilotuak harrera ezin hobea izan zuen. Horregatik, 2026an Familion egitasmoa indarberrituta itzuliko da!

Baigorritik Lesakara, Arbonatik Oriora, Euskal Herri osoko 30 familiak elkarrekin bizitzeko, ikasteko, jolasteko eta euskaraz gozatzeko aukera izan zuten. Abentura ederra, hitzez azaltzea zaila den horietakoa!

Euskaraz bizitzeko, familian eta elkarrekin

Proposamena sinplea bezain berezia zen: goizetan, gurasoek euskara eskolak jasotzen zituzten bitartean, haurrak animatzaileekin aritzen ziren jolasean eta euskarazko jardueretan. Eguerditik oheratu arte, berriz, gurasoek eta haurrek elkarrekin parte hartzen zuten euskarazko aisialdi eta kultura jardueretan.

Baina Familion ez zen euskara ikasteko egonaldi hutsa. Hiru helburu nagusi zituen: euskararen ezagutza hobetzea eta familia barruko hizkuntza ohiturak sustatzea; Euskal Herriko lurralde eta kultur aniztasuna ezagutzea; eta talde-lana, bizikidetza eta elkartasuna bezalako balioak lantzea.

Eta emaitza? Bi astez, barre algarak, emozioak, malko batzuk eta begiak zein belarriak zabal-zabalik izan zituzten familiak. Elkarrekin ikasi, deskubritu eta bizitzeko aukera paregabea!

2026an, esperientzia hobetuta eta aberastuta

Lehen edizioaren ondoren, parte-hartzaileekin eta antolatzaileekin batera egindako ebaluazioak hobekuntza eta aukera berriak ekarri ditu. Jasotako iritziak eta proposamenak kontuan hartuta, 2026an Familion egonaldia errepikatuko da, esperientzia are aberasgarriagoa izan dadin.

Bide honetan, proiektua garatzen lagunduko duten erakunde eta eragile garrantzitsuak izango dituzte bidelagun: POCTEFA, Euroeskualdea, Euskarabidea, Gipuzkoako Foru Aldundia eta Euskal Kultur Erakundea.

Zer berri ekarriko du 2026ko edizioak?

Aurten, lau berritasun nagusi izango ditu egitasmoak:

  • Bi egun gehiago elkarrekin bizitzeko: egonaldi bakoitzak zazpi egun eta sei gau iraungo ditu.
  • Herriko kulturari leku handiagoa: herri kulturaren ezagutza eta deskubrimendua sakonduko dira.
  • Haurren erritmoari egokitutako egitaraua: jarduerak arindu eta atsedenari zein jolas libreari leku handiagoa emango zaie.
  • Familia gehiagorentzat ateak zabalik: aitona-amonak eta amona-aitonak, baita guraso euskaldunak ere, gonbidatuta egongo dira esperientzian parte hartzera.

Familionek argi du: euskara familian bizitzeko, gozatzeko eta partekatzeko hizkuntza da. Eta horretarako, Euskal Herria ezagutzea, elkarrekin esperientziak bizitzea eta komunitatea sortzea baino modu ederragorik ez dago.

2026an ere, prest al zaudete familia osoarekin euskaraz bizitzeko abentura berri bati ekiteko?