Gabonak hurbiltzen dira eta sinesmenak sinesmen familia egunak izan ohi
dira. Horri, udazkena eta negua nork bere barnera begiratzeko urtaroak izatea batzen zaie.
Aurten, gainera, pandemia egoerak ezjakintasuna, distantziak mantentzea,
hildakoak nahi bezala ez agurtzea… eragin digu.
Eta batzuk horretaz gain, doluan gaude eta data hauek are bereziagoak
egingo zaizkigu. Horregatik, gako batzuk eman nahi dizkizuegu zuen burua zaindu eta inguruko haurrengan eraginik positiboena izateko asmotan.

Nola aurre egin gabonei doluan gaudenean?


Beharbada dagoeneko entzunak dituzue honen inguruko aholkuak, zorionez hitzaldi ugari baitaute egunotan. Baina laburki ideia batzuk emango dizkizuegu lagungarri izan daitezkeelakoan. Beti ere kontutan izan, hori bai, ​ ahal duguna egingo dugula eta geure burua epaitu beharrean, gure jokabidea ulertzea dela kontua, kontzientzia jartzea.

Zer egitea ez da gomendagarria?


Askotan, ​ ezer gertatu ez balitz bezala egitea​ da barnetik sortzen zaiguna,
inor faltako ez balitz bezala ospakizunak aurrera eramatea.
Horrek, isolamendua ekar lezake, familian hildakoez hitz egiteko aukerak itxiz eta bai senideen arteko komunikazioa bai norbere dolua zailtzeko arriskua areagotu.


Beste batzuetan, ordea, ​ ihes egiten dugu​ , beste edozein egun bezala
pasatuz edo, aurten zailagoa bada ere, oporraldian nonbaitera joanez.
Bigarren aukera hau hasieran baliagarria izan daiteke, baina etorkizunean
ospatuko ditugun lehenengo gabonak askoz gogorragoak izango dira eta kasurik muturrekoenean, gabonak inoiz ez ospatzera iritsi gaitezke.
Esan bezala, barneak hori eskatzen badigu, besteok ez gara hori epaitzeko
inor, baina norberak jar dezala arreta bere jokabidearen zergatian eta baloratu norberarekiko zien inguruko haurrekiko izango duen eragina.

Eta orduan, zer egin?


Egongo zaretenak egun batzuk lehenago elkartu zaitezte edo hitz egin
ezazue nor eta zer egin adosteko. Horrelakoetan, behin baino gehiagotan esan dugun bezala, haurrek ideia bikainak izaten dituzte eta oso positiboa da euren garapenerako horrelako erabakietan parte hartzea.

Halere, badezpada hainbat ideia proposatzen dizkizuegu:

  • Bazkari-afariaren aurretik edo ondoren gure hildakoen inguruan hitz
    egin.
  • Mahaian edo inguruan hildako bakoitzaren oroimenez kandela bat
    piztu.
  • Hildako bakoitzaren argazkiarekin gabonetako zuhaitzerako apaingarri
    bat zintzilikatu.
  • Etxeko txikiek, nahiko balute, hildakoaren oroimenez marrazkitxo bat
    egin eta etxeko txoko bereziren batean jarri.
  • Hildakoei gustatzen zitzaizkien abestiak jarri ospakizunen bitartean.

Horrelakoekin identifikatuak sentitu ez edo deseroso bazeundete, ez egin,
mimoz egin beharreko gauzak direlako. Baina zuen pertsona maiteak gogora ekarri eta zuen artean baimendu emozionatzea, negar egitea eta noski, doluan egonda ere, momentu alaiez ere gozatu eta ez zuen burua epaitu.
Eta bestalde, zure burua zaintzeko tarteak hartu, emozionalki egun oso
intentsoak datozkigu eta guregan fokua jartzea ere ezinbestekoa da.

Jaio aurretik edo jaio eta berehala hildako haurrak ere gogoan


Orain arte hildako senideez aritu gara, orokorrean. Baina gogorra eta aldi
berean isilarazitako doluren bat badago haurdunaldian zehar edo jaio berritan hildako haurrena da.
Kasu honetan haurren hutsuneaz gain, bizi ez izandakoaren mina ere
badugu, izango zela uste genuena eta izango ez dena.
Horrelakoetan ere, aurreko aholku berdinak emango genituzke eta are
gehiago, gertukoei jakinarazi zure seme-alabaz hitz egiteak lagunduko dizun, askotan zure baimenaren zain egongo baitira eta ez baitute nola aritu jakiten.
Berbalizatu, hitz egin.
Anai-arrebarik badago eta beraiekin naturaltasunez hitz egin izan baduzue
euren anai-arrebez, zuen konplize izan daitezke.
Alde honetatik, pandemiak egoera erraztu dezake, zuen txikiak etxekoekin
bakarrik gogoratu nahi badituzue, azalpen handirik eman beharko ez duzuelako. Eta horrek beste urte edo egoera batzuetarako indarrak emango dizkizuelako akaso.

Laburbilduz


Egiten duzuena egiten duzuela, kontzientziaz egin, alde eta kontrako puntuak baloratu eta etxekoen artean erabakiak hartu.

Zure emozioei tokia eman eta denak maitaunez jaso, tristura, mina,
haserrea… normalak dira, baina baita alaitasuna, poza eta itxaropena bezalako emozioak ere.
Eta argi izan momentu zailak egongo direla eta geure auto-zainketarako
uneak bilatu beharko ditugula.
Espero dugu aholku txiki hauekin gabon hauek zeozer arintzea.
Eta… ahal den neurrian, eguberri on!