Gau Beltzaren inguruko doako online formazio saioa antolatu du Taupa Euskaltzaleen mugimenduak. Formazio honetan, Gau Beltzak heriotzarekiko hurbilketa soziala egiteko eskaintzen duen aukera izango da aztergai, Nere Erkiaga, Hil Arte Bizi proiektuaren arduradunarekin, eta Edurne Mitxeo idazlearekin batera. Horrez gain, Ospakizuna antolatzeko gako eta baliabide praktikoak ere eskainiko dira.

Urriaren 22an izango da, asteazkena, 18:30ean. Hemen klikatuz eman daiteke izena.

Herriz herri zabaltzen

Gau Beltza gero eta herri gehiagotan ari da indarra hartzen; Mutriku, Eibar, Txantrea, Aretxabaleta, Lekeitio, Oiartzun, Baliarrain, Pasaia edo Arrasate esaterako. Horrelako jaiak, askotan, batzorde edo herri-eragileen ekimenez sortutakoak dira, ikuspegi komunitariotik antolatuak; aurrekontu txikiekin, baliabide jasangarriak erabiliz eta euskarari eta herriari bizi-indarra emanez.

Horregatik, “Ospakizun honek ez dio soilik iraganari begiratzen. Ohiturak biziberrituz gaur egungo komunitateari eta euskarari eskaintzen dizkion aukerak baliatzen ditu, herritarren arteko harremanak eta parte-hartzea sendotuz” adierazi du Taupa mugimenduak.