Jolasak, ginkanak, abestiak, ipuin kontaketak… denetarik biltzen du Haur Hezkuntza, Lehen Hezkuntza eta Bigarren Hezkuntzako haur eta gazteentzat espresuki sortutako unitate didaktikoak.

Gaubeltza.eus webgunean dago edonorentzat eskuragarri, jaiaren inguruko beste hainbat informaziorekin eta euskarrirekin batera; izan ere, badira munduko herrialde gehientsuenetan ospatzen diren tradizioak. Santu guztien egunaren bezperako jaia da horietako bat: esanahi handiko efemeridea, hildako ahaideen memoria goresteko sortua baita. Halloween deitzen diote anglosaxoiek, Hildakoen Eguna latino-amerikarrek, eta Arimen Eguna deitu izan zaio gurean aspaldidanik.

2018an abiatutako proiektua

2018an abiatu zuen Euskaltzaleen Topaguneak Euskal Herriko usadio zahar horren berreskuratze lana. Hiru urteotan Gau Beltzak bide emankorra egin du, eta ospakizunaren bezperatan ezagueran sakontzeko eta ikasleak jai horretan barneratzeko tresnak helarazteko unitate didaktikoa sortu du orain Euskaltzaleen Topaguneak, beti ere jolasaren esparruan baina asmo pedagogiko landuarekin. “Egiten duguna gara, kultura baten nolakotasunak ematen baitio izatea herriari. Nola bizi, hala izan. Eta hori du, hain justu, Gau Beltzaren inguruko lanketak helburu. Gurean aspalditik errotutako ospakizuna indarberritzea eta suspertzea”, azaldu dute.