Gazteen hizkuntza errealitatea izan dute aztergai asteon Eskoriatzan egindako Euskal Soziolinguistika Jardunaldian.

Soziolinguistikako Klusterrak Mondragon Unibertsitatearen Humanitate eta Hezkuntza Zientzien fakultatean egin du Euskal Soziolinguistika Jardunaldiaren hamabigarren aldia, eta 110 lagunek jarraitu dute streaming bidez hiru proiektuen aurkezpena.

“Hizkuntza biziberritzearen gainean kezka dugunon artean partekatzen dugun interesa da gazteen eta nerabeen artean ematen ari diren joera aldaketak. Kezka hori etengabea da eta etengabe ari da berritzen. Aldi berean, ikerketa mailan, mila ikuspegitatik begiratzen zaio errealitate honi eta tartean behin merezi du horrelako topaketa bat egitea”, azaldu du Soziolinguistika Klusterreko kide Asier Basurtok.

Euskararen erabilera gazteen artean

Jone Miren Hernandez eta Olatz Altuna ikerlariek gazteak eta euskararen erabileraren inguruko ikerketaren emaitzak aurkeztu zituzten. Erabilera horretan eragiten duten faktoreetan modu kualitatiboan sakondu dute, eta atera duten ondorioetako bat da gazteek euskara familiarekin eta eskolarekin lotzen dutela, eta horiek ez direla gaztaroko esparru garrantzitsuenak.

“Familia eta eskola beti izango dira garrantzitsuak, baina bizipen mailan garrantzitsuagoak diren beste esparru batzuk agertzen dira gaztaroan eta nerabezaroan. Eta, hain zuzen ere, bizipenen arloan gazteentzat hain garrantzitsuak diren esparru horietan euskarak nahiko presentzia gutxi dauka”, azaltzen du Jone Miren Hernandez ikerlariak.

Hala, eskola eta familia esparruetatik kanpo dauden hutsuneak betetzea proposatzen dute ikerketan, beti ere belaunaldi berrien beharrak aintzat hartuta.

Eskola giroko hizkuntza

Iñaki Martinez de Lunak eta Maialen Iñarrak, bestalde, eskola  giroko hizkuntza erabilera izan zuten hizpide Arrue ikerketaren barruan jasotako datuak aztertuaz.

Datu horien arabera, 2011 eta 2017 artean igoera xumea izan zuen euskararen erabilerak LH4 mailan. Aldi, DBH2 mailan erabilera mantendu egin zen. D ereduari buruzko gogoeta egiteko beharra planteatu dute, besteak beste, ikerlariek. “Euskararen biziberritzearen ikuspuntutik eta bilakaera emaitzak ikusita ez ote dugu B ereduaren inguruko gogoeta bat mahai gaineratu behar? Zer eta nola laguntzen du eredu horrek eskola euskara erabiltzeko gune eroso bat izan dadin ikasleentzat?”, azaldu du Maialen Iñarra ikerlariak.