Udako oporraldira begira, Biblioporrak gida atera du Arrasateko Bibliotekak, Aretxabaletako, Aramaioko, Oñatiko, Bergarako, Eskoriatzako eta Legazpiko udal liburutegiekin elkarlanean. Urtero argitaratzen den gida honen hogeita zortzigarren edizioa da hau. 

Oraingo honetan, gazteendako egin dituzten euskarazko liburuen proposamenak zerrendatuko dizkizuegu.

‘Zerria’

Patxi Zubizarretak Erein argitaletxearekin argitaratutakoa. Horrelaxe laburtu dute gidan: “Bereket glaziologoa Suitzako Alpeetan lanean ari dela, momifikatuak dauden hiru gorpuzki azaltzen dira glaziar batean. Aurkikuntzak hunkituta, ikertzaileak ahal duen guztia egingo du pertsona horiek nortzuk izan ziren jakiteko. Nobela ezin hobeto eraikia irakurlearengan intriga sortzeko. Ez zaitu epel utziko!”.

‘Trumpet’

Monica Rodriguezek Ibaizabal argitaletxearekin argitaratutakoa. Honela laburtu dute: “Mateo gazteari barruan zerbait mugitzen zaio Maliken trompeta entzuten duenean kalean. Musikaren bitartez adiskidetasun harreman bat sortuko de bien artean eta, bitartean, New Orleanseko jazz jotzaile ospetsuaren iragana azaleratzen joango da kea eta musika darion eleberri honetan”.

‘João’

Paloma González Rubiok Ibaizabal argitaletxearekin argitaratutakoa. Hemen laburpentxoa: “Miguelek kostaldeko herri batean bizimodu arrunta darama bere amarekin eta arreba Inesekin. João zibilizaziotik kanpo bizi da Meltemi izeneko belaontzian eta oso gutxitan lehorreratzen da. Nerabe hauen bizitzak ezustean gurutzatuko dira, eta horrek betiko aldatuko du euren etorkizuna”.