2024tik aurrera, jostailu dendek genero “neutroko” sail bat eduki beharko dute Kalifornian. Hala ere, legeak ez du debekatzen neskentzako eta mutilentzako sailak egotea. Zer iruditzen zaizu?

Horri buruzko lau iritzi jaso du Puntua astekariak, eta bertan jasotako lau iritziak ekarri ditugu gurera.

Itsaso Pagoaga, Olgeta jolaserako baliabide zerbitzuak

“Jostailu dendek generorik gabeko jostailuen gunea izatea aurrerapauso bat izan daiteke, baina ez da nahikoa. Oraindik dendetan neskei eta mutilei zuzendutako jostailuak saltzen jarraitzen badute, neurria itxurakeria kontua besterik ez da izango”.

Juan Manuel Axpe, Zur eta lur jostailu denda

“Guk jostailuak motaka ditugu sailkatuta, baina inoiz ere ez neska edo mutilentzat bezala. Hala ere, egia da jostailu asko kaxa urdin edo arrosarekin datozela, nahiz eta funtsean gauza bera izan. Hor helduon erabakia da haurrari zer erosi, bereizketarik egin gabe”.

Igone Osinaga, herritarra

“Jostailu guztiek neutroak izan beharko lukete, bereizketarik egin gabe. Hirugarren sail bat zabaltzeak ez du arazoa konponduko. Gizartean dagoen txipa aldatu behar da, eta horretan jarri indar guztia. Asko hobetu da, baina lan handia dago aurretik”.

Aitor Miner, herritarra

“Berdintasunean oinarritutako gizarte inklusiboa nahi badugu –arraza, erlijio, sexu, zein rol bereizketarik gabekoa–, funtsezkoa da umeen hezkuntzan balio batzuk lantzea. Jostailuak tresna baliagarriak izan daitezke helburu horretan”.