Eskoletan urmaelak sortzeko ideia Alemaniatik ekarri zuen Aranzadi Zientzia Elkarteko Herpetologia Sailak. Tübingen herriko eskola batean, umeak naturara gerturatzeko eskolatik kanpo zegoen urmael batera joateko ohitura zutela ikusita, Euskal Herrian antzeko esperientzia bat egitea pentsatu zen. Hala, 2013an, Ereñotzuko Txirrita Herri ikastetxekoekin batera sortu zen aurreneko urmael didaktikoa. Esperientzia berritzaile horrek jarraiera izan du, eta egun urmaelak eta horiei loturiko proiektuak eskola ezberdinetan topa ditzakegu.     

Eskoletako Urmaelen Sarea (EUS) eskola inguruan urmaela edo putzua duten eta eremu hori erabilera didaktikorako erabiltzen duten Euskal Herriko ikastetxeen sarea da.

Elgetan (Gipuzkoa) 2022an sortu zuten urmaela eta ordutik proiektu pedagogikoan txertatuta dagoen gunea da. Gurasoek hala eskatuta, urmaelaren bueltan eskolan egiten diren jardueren berri izateko saioa egin dute. Aranzadi Zientzia Elkarteko herpetologo Ion Garin izan zen saioa gidatzen. Aurrena, eskolan, burruntzien eta sorgin-orratzen gaineko erakusketa bat bisitatu zuten herritarrek. Ondoren, urmaelera egin zuten bi urteotan putzura heldu diren intsektuak eta landareak ezagutzeko.