Altxa burua! Tolosako guraso elkartea da eta haur nahiz nerabeek pantailetatik burua altxatzea eta lehen gailua eskuratzeko adina atzeratzea da euren helburua. Ideia horretatik abiatuta sortu zuten Tolosako Samaniego, Herrikide eta Laskorain ikastetxeetako guraso elkartea eta, ordutik ekintza ugari antolatu dituzte. Horietako bat da martxan jarri dutena; Geurea erabili dezakegu, hain zuzen ere.

Orkatz Goenaga da Altxa Burua! ekimeneko kideetako bat eta guraso nahiz haurrei “bidea erraztu” nahi dietela azpimarratu zuen egitasmoaren aurkezpenean. Tolosako Udalak bat egin du ekimenarekin eta horregatik, pegatina identifikagarriak diseinatu ditu eraikin publikoetan zein proiektuarekin bat egin duten saltokietako erakusleihoetan jartzeko.

“Haur, nerabe zein gazteek udal eraikin edo komertzio batean pegatina hori ikusten dutenean jakingo dute, inolako azalpenik eman behar izan gabe, bertako telefonoa erabili ahal izango dutela behar duten dei hori egiteko”, azaldu zuen Goenagak.

Herriaren babesa

Lehen gailua eskuratzeko adina atzeratzeaz aparte, gurasoei haurrengan duten beldurra kentzeko balio izango diela zioen Goenagak, “jakin dezaten badagoela komertzio oso bat eta herri oso bat behar duen haur edo nerabe horri, une jakin batean, laguntza eskaintzeko”.

Iturria: Ataria.eus