Euskal Herriko Unibertsitateko irakasle eta Aldahitz proiektuaren zuzendari Pello Jauregi da Uler-saioak metodologiaren garatzaile nagusia. Soziolinguistika Klusterrak liburu batean jaso ditu metodologiaren oinarriak, eta eskuragarri dago sarean.

Ulermen ezak edo ulermen urriak dakarren euskarazko komunikazioaren ezinari erantzuna emateko sortua da Uler-saioak metodologia. Helburua da norbanakoek ahalik eta eperik laburrenean euskara ulertzeko oinarrizko gaitasuna eskuratzea euskarazko harremanetan murgiltzeko aukera izan dezaten, gutxienez ele biko elkarrizketen formatuan. Uler-saioak metodologiak 60 orduko prozesu edo diseinu bat proposatzen du denbora tarte horretan norbanakoek A1 mailako ulermena eskura dezaten.

“Metodologia, funtsean, ingurune babestu batean garatzen da: gela batean, ordutegi baten barruan eta hizkuntza-soslai bera duten beste kide batzuekin batera. Bertan, trebatzaile batek euskarazko input ulergarri ugari ematen die kideei. Trebatzaileak, euskara erraza eta sinplea erabiliz, komunikazio-jarduerak bideratzen ditu, eta etengabe egiaztatzen du jasotzaileek ulertutakoa. Ez du metodologiak zuzenean garatzen euskaraz hitz egiteko gaitasuna. Ez die norbanakoei euskaraz egiteko eskatzen. Ulermena da foku bakarra, eta ondorioz norbanakoei dagokie etengabe egiaztatzea trebatzaileari ulertu diotena”, azaltzen dute bultzatzaileek.

Metodologia gauzatzeko egunez eguneko programazioa aurkezten da liburuan, eta hari atxikita jarduera pedagogikoa laguntzeko hainbat aholku metodologiko.

Metodologia testatzeko esperientziak

Metodologia frogatzeko esperientzia batzuk egin dira zenbait erakundetan 2016tik. Hala nola, Gipuzkoako Foru Aldundiko Ogasun eta Finantza Sailean, Fagor Arrasate Kooperatiba elkartearen Donostiako atalean edota Eibarko Armeria Eskola Lanbide Heziketan.

Ikasturte honetan talde gehiago osatu nahi dira modu horretan metodologia eraginkorra dela modu testatzen jarraitzeko Oraingoz, praktikan esperientzia gutxi batzuk bakarrik egin dituzte: Gipuzkoako Aldundiko Ogasunean, Fagor Arrasate Donostiako lantegian eta Eibarko Armeria Eskolan. Irailetik aurrera hasiko dira era orokortuago batean metodologia aplikatzen.

Metodologia eraginkorra dela testatzen jarraitzen dute ikertzaileek. Ikasturte honetan 15 bat talde jarri nahi dituzte martxan. Horien artean gurasoak ere egon daitezke.

Metodologia interesgarria izan daiteke zero edo hasierako maila duten gurasoentzako.