Gurasoentzako bideo jokoen gida argitaratu du Game Erauntsiak
![](https://guraso.eus/wp-content/uploads/2024/07/lander-768x512-1.jpg)
Bideojokoak eta euskara uztartzeko helburua duen elkarteak, gurasoei zuzendutako gida argitaratu du. Gida honetan, gaur egun guraso askok izan diztzaketen zalantza eta kezkak landu dituzte.
Bideojokoen mundua etxeko txikientzat zein nerabeentzat kaltegarria izan daitekeela irakurtzen dugu behin eta berriz. Biolentzia, jazarpena, nahi gabe egindako erosketa garestiak, sexua… beldur asko dituzte gurasoek nahiz irakasleek, ulertzekoa den bezala, baina ezjakintasunak eraginda.
Game erauntsititk aipatzen dutenez gida honen helburua bideojokoei lotutako hainbat gako ezagutaraztea da: gurasoentzako kontrol tresnak, adinkako sailkapenak, gomendatutako bideojokoak…
Guk Game Erauntsiko Lander Unzuetarekin hitz egin dugu gida honen nondik norakoen berri izateko.
![](https://guraso.eus/wp-content/uploads/2024/07/lander-768x512-1.jpg)
Gazte euskaldunak bideojokoetan
UEMAk 2022. urtean aurkeztutako Euskal Herriko gazteen ikus-entzunezkoen kontsumoari buruzko ikerketan ageri denez, hiru gaztetik bik bideojokoetan jokatzeko ohitura daukate egunerokotasunean.
Orduei dagokienez, gazteen % 25,9k ordu erdi baino gutxiago ematen du egunean jokatzen; % 17,5ek ordu erdi eta ordubete artean igarotzen du partidetan; % 13,5 ordubete eta bi ordu artean aritzen da; % 9,7k bi ordutik gora jokatzen du. Bukatzeko, ikasleen % 33,3k ez du bideojokorik erabiltzen.
Arriskuak… eta onurak
Argi dago bideojokoak gure aisialdiaren elementu nabarmenean bilakatu direla. Esan bezala, beldurra eragiten du horrek gurasoen eta hezitzaileen artean: gehiegizko erabilera arrisku esanguratsua da, eta hori ekiditeko bideak bilatzen dituzte.
Halere, elementu positiboak ere aurki ditzakegu bideojokoen munduan. Harremanak lantzen ikasteko aproposak dira; gainera, denbora kudeatzen ere irakats diezakegute; emozioen kudeaketa lantzeko eraginkorrak dira, enpatia zein pentsamendu sortzailea areagotuz; bukatzeko, hizkuntzen ikasterarako ere lagungarriak dira!
Iruzkinik ez "Gurasoentzako bideo jokoen gida argitaratu du Game Erauntsiak"