Bat-batekotasuna da bertsolaritzaren ezaugarri nagusia eta askotariko gaiak hartzen dituzte hizpide bai bertsolariek bai haiei gaiak jartzeko ardura hartzen duten gai-jartzaileek.

Gurasotasunarekin lotutako askotariko gaiak jaso zituzten urtarrilaren 23ko Hitzetik Hortzera saioan.

Hiru bertso sorta nabarmendu nahi izan ditugu gaurkoan:

1. Lezamako saioan Pello Madariagak Maialen Lujanbiori eta Andoni Egañari jarritako gaia: Bi ume gaztelera hutsean ari dira. Gurasoak gerturatu, eta euskaraz egiteko esanez errieta egiten diete. Buelta eman orduko, ordea, gaztelera hutsean hasten dira gurasoak kuadrillakoekin paparrean Ahobizi txapa daramatela. Bideoaren 08:50. minutuan aurkituko da bertso sorta hori.

2. Maite Berriozabalek Maialen Lujanbiori jarritako gaia: 11 urteko alaba duzu eta iritsi da sexuaz edo sexualitateaz berba egiteko unea. Zer azaldu nahiko zenioke? Zer da esaten diozuna? Alabarekin hitz egin ostean ze ondorio ateratzen duzu eta nola sentitzen zara? Bideoaren 14:19 minutuan aurkitzen dira bertsoak.

3. Pello Madariagak Amets Arzallusi eta Alaia Martini jarritako gaia: Ametsek 15 urte egin ditu preso eta beste 10 aske. 7 urteko alabarekin dago dei bat jasotzen duenean. Berriro ere kartzelan sartzeko aukera dago. Alabak negarrez ikusten du aita. Bideoaren 43:33. minutuan daude bertsoak.

Saioa osorik hemen.