Asociación Madres Solteras por Elección taldeak antolatutako lehiaketan parte hartu du Eskoriatzako Luis Ezeiza eskolak, eta Haur Hezkuntzako bideoklipen sailean banatu dituzten hiru sarietako bat jaso du.

Zuzendaritzakoei iritsi zitzaien elkartekoen mezua eta eurek egiten zuten proposamena irakurri ostean, parte hartzea erabaki zuten. Halaxe adierazi du Luis Ezeizako Haur Hezkuntzako irakasle Uxue Ariñok: “Ikusi genuen familia aniztasuna oso gai garrantzitsua dela, geroz eta aniztasun gehiago dagoela gaur egun alderdi desberdinetan eta batez ere familia ereduetan, eta uste dugu oso inportantea dela hori ere gure haurrek ikustea. Ez bakarrik Familia Eguna ospatzen dugunean, baizik eta urte guztian zehar lantzen dugu ipuinen, jolasen eta batez ere gure hizkuntzaren bitartez. Adibidez, galdetzen diogunean nor etorriko den euren bila, ama ala aita esan beharrean, orokortu egiten dugu eta familia hitza erabiltzen dugu gehiago”. Gaineratu du, orokorrean urte guztian zehar landu dutela gaia, baina lehiaketan parte hartu dutenez, denbora zehatz batean, “sakonago” landu dutela.

Prozesua oso polita izan dela ere azaldu du: “Ilusioarekin jaso genuen parte hartzeko mezua, iruditzen zaigulako oso gai garrantzitsua dela eta saiatzen gara lantzen, baina aitzakia horrekin gehiago sakondu dugu gaian. Oso pozik gaude baita ere, lanketa horren bitartez, gai asko atera ditugulako eta ikusi ahal izan dugu ume bakoitzak nola bizi duen familia eta zein estereotipo dituzten. Bideoa ere gustura egin dugu”.

Sortutako bideoa eskolan gelditzen denez, horren bitartez eurek ere familia aniztasuna eta aniztasuna orokorrean, gerora lantzeko aukera emango diela ere gaineratu du irakasleak.

Gaia txikitatik lantzearen garrantzia ere azpimarratu du: “Ikusteko eurek ere mundua anitza dela eta ume bakoitzak daukan errealitatea mundu honetan posible dela. Guk dauzkagu aitarik ez daukaten umeak, esaterako, eta jakin behar dute ez dela familia eredu bakarra egon behar. Eurak ere osorik senti daitezkeela daukaten familiarekin. Eta aniztasuna era orokorrean: norbera ondo sentitu behar dela denarekin; sentitzen duenarekin eta daukanarekin. Aitarik ez daukan umeak ez du sentitu behar hutsune bat daukala. Beste familia berregituratu batzuk ere baditugu eta ume horiek ere sentitu behar dute hori dela euren familia”.

Bakoitzak familia sentitzen duen modua ikustea ere polita dela gaineratu du Ariñok: “Oso polita da baita ere ikustea ume bakoitzak nola sentitzen duen bere familia eta nola adierazten duen; zein rol dauden, atxikimendua norekin duen… Azkenean garrantzitsua ikusten dut ikustaraztea anitzak garela orokorrean denok, gizartea anitza dela eta familiak ere bai eta ez dela ezer gertatzen”.

Hauxe da saria jaso duen bideoa.