HARREMAN POSITIBOAK ERAIKITZEN

Maitatuak eta baloratuak sentitzea esperientzia garrantzitsu bezain ezinbestekoak dira pertsonaren garapenerako. Garapenaren barruan alderdi sozialari dagokionean, bizipen garrantzitsuak dira hauek haur eta gazteek beraien buruaz, besteekin eta inguruneaz harreman positiboak eraikitzeko. Beraz, nola sustatu dezakete gurasoek harreman positiboak eraikitzeko esperientzia eta bizipenak?

Maitatuak eta baloratuak sentitzea edonori gustatzen zaigula esan genezake. Ez hori bakarrik, maitatuak eta baloratuak sentitzea esperientzia garrantzitsu bezain ezinbestekoak dira pertsonaren garapenerako. Garapenaren barruan alderdi sozialari dagokionean, bizipen garrantzitsuak dira hauek haur eta gazteek beraien buruaz, besteekin eta inguruneaz harreman positiboak eraikitzeko. Beraz, nola sustatu dezakete gurasoek harreman positiboak eraikitzeko esperientzia eta bizipenak?

Lan horretan lau lirateke ardatz nagusiak:

1) Komunikazio gaitasuna hobetu

Heziketa asmoa duten hizketaldiez gain, guraso eta seme-alaben artean elkarrizketak egon behar dira. Hauek ezinbestekoak dira elkar ezagutu eta lotura sendotzeko. Zentzu honetan zer egin dezake gurasoak?

• Norberaren komunikazio ereduari erreparatu

• Seme-alabek besteek esaten dutenarekiko interesa noiz agertzen duten konturatu

• Egunean zehar gertatutakoak kontatu, norberaren haurtzaroko kontuak…

• Haur edo gaztearen egunaren inguruan interesa agertu, lagunen inguruko kontuak ere kontatzera animatu

• Haurrak besteei zerbait azaldu ahal izateko egoera sortu

• Imitazioak adin batzuetan duen garrantzia ikusita, haur edo gazteen presentzian beste heldu batzuekin hitz egin

• Helduekin hitz egiteaz gain, bere adinekoekin hitz egitera bultzatu

2) Proiektu komunen bidez lotura sendotu

Hitz egiteaz gain, garrantzitsua da elkarrekin gauzak egitea. Eta ez beti helburu jakin batekin; baizik eta gauzak batera egiteak berak zentzua duelako. Emaitzak ez du horrenbeste axola; egiten den horrek hartzen du garrantzia.

• Seme-alabekin dibertitzeko tartea hartu.
• Ez ahaztu haur eta gazteak oso dibertigarriak izan daitezkeela.

• Elkarrekin zerbait egitean, gauzak ongi egiten dakizkiela sentiaraziko duen eremuetara erakarri.

• Haur edota gazte guztiek dakite zerbait ongi egiten. Arakatu zertan den ona (beharbada, irakaslearen laguntza interesgarria izan daiteke)

• Erronka lorgarriak planteatu

Ongi egitean, gehiegizko laudorioek ekar dezaketen arriskuetaz jabeturik, egokiagoa da egindako horren gainean hitz egin eta interesa agertzea. Esaterako, haurrak marrazki bat egin berri du. “Bikaina zara!”, “artista bat zara”, “ez dago zu bezalakorik!!” bezalakoak erabili ordez, egokiagoa litzateke horrenbesteko garraz baino, zehaztasun handiagoz hitz egitea. Adibidez, “zuhaitzei emandako forma interesgarria da”, “oso kolore politak erabili dituzu”, “zer esan nahi du borobil honek?”, “zein eguraldi egiten du zure marrazkian?”, “irudien inguruan hitz egin berarekin… haurrak zenbat gauza berri azaldu ahal dizkizun harrituko zaitu!

Guraso edo etxekoez gain, taldeka egiten diren beste ekintzetan parte hartzera animatu

3) Famili antolaketan arduratsu izateko aukerak sustatu

Ardura hartzeko aukerek arduratsu izateko gaitasuna sustatzen dute. Zentzu honetan, zer egin daiteke?

• Eguna egituratu eta antolatuta izateak asko laguntzen du. Egunerokotasunarekin lotutako erritualak garrantzitsuak dira haurrentzat: egun onak ematea, eskolatik iristean muxua ematea, lotaratu aurretik ipuina kontatzea…

• Arauak argi azaltzea. Arauak zentzudunak izan behar dira. Haur edo gazteen erantzun edo erreakzio batzuk ikusita (muturrak, hitz egin gabe egotea denbora batez…), zenbaitetan zaila suertatzen da arauak mantentzea. Baina erabakiak ez dira seme-alaben erantzunen arabera hartu behar, aurrez hausnartutako zerbait izan behar dute.

• Esparru ezberdinetan ardurak delegatu: harremanetan (amonari barre eragitea, gaixo dagoen arrebari infusioa prestatu, lagunaren oparia aukeratu); etxeko lanetan (enkargu txikiak egin, landareen zaintzan lagundu…); antolaketan (oporrak antolatzen lagundu, bizikleta erosi ahal izateko dirua aurrezteko moduetan pentsatu…).

4) Jakin-mina eta sormen gaitasunak esnatu

Garrantzitsua da haurraren jakin mina eta harridura piztuko duten esperientziak bizitzeko aukera ematea.

• Istorio harrigarriak asmatu, magia truku bat erakutsi, gauzen funtzionamendua azaldu (errota batena, imanena…). Mota honetako jolas eta jarduerek haurraren jakin mina pizteaz gain, helduena ere estimulatu egiten duela konturatuko gara. Jolaserako, jostailuez gain edo jostailuen ordez, beste material batzuk eman

• Aspertuta daudenean ez proposatu jolasik beraiek zerbait asmatu arte

Ondorioz, harreman positiboak eraikitzeko, gure seme-alabekin egin ditzakegun gauzak hamaika direla esan dezakegu. Ez da ahaztu behar, ordea, garrantzitsuena ez dela planteatutako zerrenda betetzea. Ideia pila honek, abaildu edo larritzeko baino, gurasoen kezka arindu eta arreta beraien jarreretan jartzeko lagungarri izan beharko luke. Izan ere, gurasoak harremanak baloratzen baditu, inguruan gertatzen denaz inplikatu, balore batzuetatik abiatuz orientatu, besteen nahiz norberaren alderdi positiboak hauteman eta zailtasunei aurre egiteko jarrera hartzen badu, itxuraz oso esanguratsuak ez diruditen baina egiazki badiren keinu txikien bidez guzti hau transmitituko du.

azaleko argazkiaren iturria