Jardunaldia 9:30ean hasiko da Durangoko Bizenta Mogel liburutegian. Sortzaileak eta programatzaileak elkartuko dira Durangoko Azokaren atarian DA!PRO topaketaren zortzigarren edizioan. Haurrentzako ikuskizunak eskaintzen dituzten sektoreko sortzaileen, profesionalen eta programatzaileen arteko elkargunea izango da.

Topaketan, euskaraz jarduten duten sortzaileek euren proposamenak aurkeztuko dituzte, eta kultur zein euskara teknikariek, liburutegietako dinamizatzaileek eta jai antolatzaileek horiek ezagutu eta aztertzeko aukera izango dute. Zuzeneko hartu-eman horren bidez, bi helburu lortu nahi ditu topaketak: kulturgileen lana Euskal Herrian zehar hedatzea eta kultur programazioa euskarazko ekitaldiekin hornitzea.

Berbaro elkarteak antolatuta

Haur ikuskizunen arloko topaketa Berbaro elkarteak antolatuko du. Jasotako proposamenak bi katalogotan txertatuko dira, eta programatzaileen esku jarriko dira, euren programazioak osatzeko.

Aurten, haurrentzako ikuskizunei eskainitako jardunaldian, askotariko diziplina eta formatuak uztartzen dituzten hamar proposamen artistiko aurkeztuko dira: ipuin-kontaketa, musika, bertsolaritza, antzerkia, txotxongiloak, ilusionismoa eta malabareak, besteak beste. Proposamenak 3 eta 12 urte bitarteko haur eta gaztetxoei zuzenduta daude, eta horietako batzuek adin-tarte zabalagoetara egokitzeko aukera ere eskaintzen dute.

Gainera, formatu anitzak dituztenez, liburutegi, kultura-areto eta jaietarako moldagarriak dira. “Euskal sorkuntza ezagutarazi, harremanak sortu eta proposamen horiek gure herrietako plaza, jai eta antzokietako programazioetara iristeko bultzada eman nahi dugu” azaldu du kultur kudeatzaile eta Durangoko Berbaro euskara elkarteko kide Itxasne Arabiourrutiak.

Hamar proposamen

Honako hauek dira hamar proposamenak: Ortzi-mugaren bi aldeak (Ameli ipuin kontalaria), Hitzekin jolasean (Taulelak Antzerki Taldea), Bertso jasa bat-bateko jolasa (Lanku), Txuri-beltza da ta! (Lanku), Otsoko eta Xixili (Lanku), Desberdinak gara eta harro gaude (La Enananaranja), 3 Elementu – 360ºko esperientzia murgiltzailea (Hodei Produkzioak), Nai Malabarista (Nai Imaginazioak), Ameztu antzerkia – Ipurbeltz (Nai Imaginazioak) eta Kay robot (Ameztu antzerkia).

“Guretzat, kultura ez da soilik ikuskizun bat ikustea edo jarduera batean parte hartzea. Kultura esperientziak partekatzea da; jakin-mina piztea, irudimena garatzea, galderak egitea, emozioak adieraztea eta besteekin harremanak eraikitzea ere bada. Horregatik, DA! PROn aurkeztuko diren proposamenen bidez, sormenaz gozatzeko ez ezik, ikasteko, hausnartzeko eta elkarrekin bizitzeko aukerak ere zabaldu nahi ditugu”, gehitu du Arabiourrutiak.

Musikari begirako DA!PRO topaketa ere izango da. Azaroaren 26rako iragarri dute.