Mirari Bikuña emagina da eta haurdun geratu aurreko ohiturez —gizonezko nahiz emakume— hitz egin du Puntua aldizkarian.

Oporretara joaten garenean, dena prestatzen dugu aurretik: nola joan, non lo egin, zer ikusi… Baina haurdunaldi baten bila hasten garenean gutxitan prestatzen dugu gorputza, nahiz eta oso garrantzitsua den haurdunaldi arrakastatsu eta osasuntsua aurrera eramateko.

Emaginok haurdunaldiaurreko kontroletan hainbat
aspektu baloratu eta gomendioak ematen ditugu.

Aurrekariak

Tiroideko gaixotasuna, tentsio altua, diabetesa eta
halakoak ondo kontrolatuta izatea komeni da haurdun geratu aurretik. Bestalde, informazio asko emango digute hilekoaren ezaugarriek: iraupena, odol kantitatea, minak… Kasu horretan, haurdun geratzeko beharrezkoak diren hormonak balio egokian dauden edo haurdunaldia zailduko duen gaixotasunen bat dagoen ikus genezake.

Tabakorik eta alkoholik ez kontsumitzea gomendatzen da haurdunaldi bat bilatzen
ari garenean; bai emakumearen eta baita
bikotekidearen –gizonezkoa– kasuan ere, obuluaren eta espermatozoidearen kalitatean eragina baitute.

Zitologia eguneratuta egotea komeni da. 35 urtetik beherako emakumeek azken hiru urteetan egina izan beharko dute eta 35etik gorakoek, berriz, azken bost urteetan.

Analisiak

Odol analisien bitartez hainbat balio modu egokian
dauden ikusiko dugu. Horien artean daude:

  • TSH: tiroidearen balioek 2,5 inguruan egon behar dute haurdun geratu aurretik.
  • D bitamina: hormona bezala jokatzen du eta 30-50 ng/ml artean egotea komeni da. Hala ez balitz, gehigarriak hartu eta analisi-kontrolekin jarraitu beharko dugu.
  • Hemograma eta burdina-profila: haurdunaldian anemia fisiologikoa gertatzen da, eta horrek eragin larririk izan ez dezan, burdina-balioek maila aproposean egon behar dute.
  • Serologia: GIB, hepatitisa, sifilia, errubeola, elgorria eta toxoplasmosiaren immunitate mailak nola dauden begiratuko dugu. Gaixotasun horiek haurdunaldian zehar atzemanez gero, fetuan arazoak sor ditzakete. Errubeola eta elgorri kasuetan ez bada immunitaterik, txertatzea proposatuko da.

Gehigarriak

Gaur egun, haurdun geratu aurretik, azido folikoaren gehigarria bakarrik gomendatzen da. Hori haurdun geratu baino hilabete lehenago hasi beharko da, 400 mg-ko dosiarekin. Gizakiok dugun alterazio genetiko baten ondorioz azido folikoa eraginkorragoa izateko, era aktiboan hartzea gomendatzen da. Beraz, hartzen dugun gehigarrian osagaiak era honetan agertu beharko du: L-metil folato, metiltetrahidrofolato, metafolin, quatrefolic edo azido lebofolinikoa.

Ohitura osasungarriak

Berebiziko garrantzia du biek ere ohitura osasungarriak izatea. Alde batetik, etorriko den haurdunaldia era arrakastatsuan aurrera eramateko, baina, batez ere, obuluen eta espermatozoideen kalitatea ona izateko. Obuluak 90-100 egun inguru behar ditu heltzeko; beraz, haurdun geratu aurreko 100 egun horietan izan ditugun ohiturek guztiz baldintzatuko dute obuluaren kalitatea.

Hala, elikadura osasungarria izatea gomendatzen da: jaten dugunaren %50 barazkiak eta frutak izan daitezela; %25, proteina osasungarriak; eta beste %25a, karbohidratoak —ahal bada, integralak—. Erabat baztertuko ditugu azukrea, prozesatutako produktuak, alkohola eta tabakoa.

Deskantsua ere oso garrantzitsua da. Lo egiten
dugunean, gure gorputzak sortzen duen melatonina
hormonak obuluen kalitatea hobetzen laguntzen duela dioten artikulu zientifikoak gero eta gehiago dira. Horrekin batera, estresaren kontrola izatea eta neurrizko ariketa fisiko egitea lagungarria dira.

Harreman sexualak

Kontuan izan behar dugu obuluaren bizitza 24 ordukoa dela obulazioa gertatu eta gero. Espermatozoideena, berriz, 3-5 egunekoa. Beraz, noiz obulatzen dugun jakitea ezinbestekoa da. Zerbixeko muki elastikoaren presentziak edo gorputzeko tenperaturaren igoera obulazioaren adierazle dira. Hileroko ziklo erregularra izanez gero eta zikloko zein egunetan obulatzen dugun baldin badakigu, haurdun geratzeko, harreman sexualak bost egun lehenago hastea gomendatzen da, eta horiek bizpahiru egunean behin izatea —eiakulazioaren ondoren, espermatozoideek 72 ordu inguru behar dituzte berriro sortu eta erabilgarri izateko—, obulazioaren hurrengo egunera bitartean.

Bukatzeko, 35 urtetik beherako emakumeek urtebete baino gehiago eta 35 urtetik gorakoek sei hilabete baino gehiago pasa ondoren ez badute haurdunaldirik lortu, analisi eta proba espezifiko
gehiago egin beharko ditu ginekologoak.