Azala zaintzeko errutinen bideoak ohikoak dira sare sozialetan eta adinez nagusiak ez diren gazte askok ikusten dituzte. Bideo horietatik produktuen erreferentziak hartzen dituzte sarritan, beraiek ere erabiltzeko. Hala, kosmetika enpresak ere haur eta gaztetxoei zahartzearen kontrako eta zimurrak murrizteko produktuak ari dira saltzen. Datuen arabera, 13 eta 17 urte arteko nerabeak dituzten Estatu Batuetako familien azala zaintzeko produktuen erosketa %28,6 handitu zen iaz, aurreko urtearekin alderatuta, eta 6 eta 12 urte artekoak zituztenena, berriz, %27,2.

Datu horiek eman ditu Maitane Legarreta kazetariak Gaztezulo atarian, eta azaldu du helduak erabiltzen ari diren produktu horietako asko ez direla haur eta nerabeentzat egokiak izaten. Izan ere, azalaren zahartzea atzeratzeko edo murrizteko izaten dira, eta halakorik ez dute behar izaten. Gainera, osagai kimikoak kaltegarriak izan daitezke euren azalarentzat. Erresuma Batuko Dermatologoen Elkartearen arabera, produktu hauek erabiltzen dituzten haurrek atzera bueltarik ez duten arazoak sor ditzakete azalean. Besteak beste, mota horretako produktuak 18 urtetik beherakoei saltzea debekatu nahi dute Californian.

Artikulu osoa, hemen.