AktualitateaGurasotasuna

Haurrak pantailarik gabe hazi nahi dituzten familia gehiagoren bila

2020-07-06 Iruzkin 1

Debagoieneko bi familia “kezkatuta” daude smartphoneen eta pantailen inguruan orokortzen ari den ereduarekin. Umeak pantailarik gabe hazi gura dituzte, eta dinamika horrekin bat datozen familien bila ari dira; harremanak sortu guran.

Familia horietako guraso batek, Patxi Monterok, azaldu du ez dutela gura haurrak horiei begira “hazi” daitezen, uste dutelako aparailu teknolo- gikoek baldintzatu egiten duela harremantzeko modua. “Eredu horren ordez, bestelako harreman eta haziera-eredua jarraitzen dugu”, aitortu du. Zehazki, adierazi du gurasoak haurrekin daudenean elkarrekin daudela; ez, ordea, pantailara begira. Bestalde, ez dituzte telefono edota tabletak erabiltzen haurrak entretenitzeko, “edota isilik eta geldi egon daitezen”. Oro har, aitortu du “zentzuz” erabiltzen dituztela telefono eta pantailak. Horretaz gain, gozokirik ere ez dute kontsumitzen: “Ahalik eta gutxien nahi genituzke gure artean; hobe bat ere ez”.

Aurrez aurreko harremanen bila

Monterok azaldu duenez, 6 eta 10 urteko bi alaba dituzte, eta Debagoienean edo inguruan pantailarik gabeko aukera hautatu dutenenekin “harremanak bilatzen” ari dira: “Gure artean eta gure haurren artean harreman ona sortzen bada, elkarrekin bidea errazteko”.

Hala, uste dute lehen urratsa litzatekeela ikustea bailaran antzeko dina- mika jarraitzen duen familiarik ba ote dagoen; kasu horretan, elkar ezagutzeko aukera egongo litzatekeelako.

Haurren arteko harremanetan zera bilatzen dutela adierazi du: aurrez aurreko harremanak bizitza errealean, jolasa, jolas librea, natura, elkar-errespetua, lasaitasuna…

“Sentsibilitate” honekin bat datorrena eta halako harreman dinamiken bila dabilena telefono hauen bidez jar daiteke bi familiekin harremanetan: 943 78 90 70 edo 675 94 46 09.



Iruzkin 1 "Haurrak pantailarik gabe hazi nahi dituzten familia gehiagoren bila"

  1. Avatar
    Patxi Montero
    2020-07-08 Erantzun

    Gurekin harremanetan jarri den familia batek erantzun hau utzi du: "Mobilei buruzko hitzaldi batetan egon nintzen otsailean edo. Izututa irten nintzen jendeak kontatu zuenarekin, eta mobila leihotik botatzeko gogoarekin. Umeei oso txikitatik erosten dizkiete mobilak, batzuk umeak kontrolatuta edukitzeko, beste batzuk esaten zuten presio sozial handia dagoela, besteei erosten dizkietelako, eta ez dutelako nahi beraien seme-alabak baztertuta geratzea. Ba nik ez dot nahi hori egitea, nik ahalik eta beranduen ematea nahi diet. Hizlariak esan zuen guraso guztiak ados jarri behar garela eta denok beranduago eman, baina hori ezinezkoa iruditzen zait... Eta nahikoa da batek edukitzea, inguruko guztiak tontotuta begira egoteko. Kezkatzekoa da benetan!"


Zure iritzia partekatu nahi duzu?

Zure eposta ez da argitaratuko. Derrigorrezko eremuak * bidez markatuta daude.

Utzi erantzuna