Zinemetan haurrentzako euskarazko eskaintza egon dadin sortu zuen Eusko Jaurlaritzak Zinema Euskaraz programa. Bada, Bieuse Bikoizle Euskaldunen Elkarteko kideek planto egin dute: ez dute programarentzako filmak bikoizten jarraituko lan baldintzak hobetu eta egonkortasuna izan arte. Egoera aldatu ezean bi dira euskaraz ikusi ahal izango ditugun filmak: otsailaren 1ean estreinatuko den Dragon Ball Super: Broly eta dena ondo bidean otsailean helduko den Lego 2.

Bieuse Elkarteak aditzera eman duenez ez dute Eusko Jaurlaritzak Zineuskadi elkartearen bidez abian duen Zinema Euskaraz programako filmak bikoizten jarraituko, eta EiTBrentzat bikoizten duen estudioan lanean jarraitzeari ere uko egin diote. Aste honetan bertan estreinatuko duten Dragoi Bola filmaren eta otsailean aretoetara helduko den Lego 2 lanaren ostean, planto egingo dute haien lan baldintzak eta egonkortasuna bermatu arte.

Bikoizleen egoera prekarioaren berri eman zuen Xabier Alkiza elkarteko kideak Euskadi Irratiko Faktoria saioan, eta Eusko Jaurlaritzaren Kultura Sailari lan baldintzak hobetzeko eta jarduna egonkortzeko eskatzen diotela jakinarazi zuen.

Urtean hamabi bat film

Urtean hamabi bat film bikoizten dituzte Zinema Euskaraz programarentzako, baina haur eta gazteentzako lan horiez gain ez dituzte helduentzako ikus-entzunezkoak bikoizten, Kultura Sailak jatorrizko bertsioaren alde egiten duelako, euskarazko azpidatziekin.

Hori dela eta, 70 dira egun Hego Euskal Herrian jarduten duten bikoiztaile profesionalak, eta horien erdia, gutxi gorabehera, elebidunak.

Jaurlaritzako iturriek Faktoriari adierazi ziotenez, Biuseren eta Kultura Sailaren arteko azken bilera hitzarmenik gabe amaitu zen, eta beraz, elkarteak harremanak haustea eta planto egitea erabaki du. Honenbestez, egoera aldatu ezean, bi dira euskaraz ikusi ahal izango ditugun filmak: Dragon Ball Super: Broly (Tatsuya Nagamine) japoniarra, eta Lego 2 (Mike Mitchell eta Trisha Gum) estatubatuarra, dena ongi bidean, otsailean helduko zaiguna. Hortik aurrera, ezin jakin negoziazioak nola amaituko dituzten.

Albistearen iturria: zinea.eus

Irudiaren iturria: Dragon Ball Super: Broly