Umeekin harreman zuzena duten helduen aktibazio ekimenaren bigarren edizioa antolatu du Euskaltzaleen Topaguneak; urriaren 19tik 29ra burutuko dute ariketa hainbat herritan. Topaguneak kaleratu du honezkero 2023ko aurkezpen txostena.

0-12 urte bitarteko umeekin harreman zuzena duten helduen sentsibilizazio eta aktibazio dinamika da. Euskaraldian bezala, helduak dira hizkuntza-ohiturak astintzeko interpelatuak. Baina, Haurren aurrean helduok heldu dinamikan helduen arteko hizkuntza portaerek umeengan duten eraginari sakontasun gehiagorekin erreparatzen zaie. Hala, heldu horien saretzea eta ahalduntzea sustatzea da helburuetako bat.

Hainbat herritan hasita daude ariketa prestatzeko lanketan. Ariketa zer den, zein helburu dituen eta nola gauzatuko den azaltzeko bilera irekiak egitea da askorentzako lehen urratsa.

Euskaltzaleen Topaguneak bultzatuta 2021ean egin zen lehen edizioa. Orduan, azaroan egin zuten eta eguraldiak ez zuen asko lagundu. Bigarren edizioa urrian izango da, urriaren 19tik 29ra.