Haurreskolak Partzuergoaren sareak hazten jarraituko du 2026-2027 ikasturtean. Irailean bost haurreskola berri irekiko dituzte Euskadin, eta horri esker sare publikoa 248 zentro izatera pasako da. Guztira, 9.133 plaza eskainiko dira 0 eta 2 urte bitarteko haurrentzat.

Azken urteotan haurreskolen eskaerak gora egin du, batez ere Haur Hezkuntzako lehen zikloa (0-2 urte) doakoa denetik. Gaur egun, 7.013 haur daude Haurreskolak Partzuergoaren sarean matrikulatuta.

Bost haurreskola berri irailetik aurrera

Ikasturte berriarekin batera, bost zentro berri jarriko dira martxan: Getxoko Kresaltsu haurreskola, Bilboko Txurdinaga, eta Donostiako Gros, Intxaurrondo Hegoa eta Loiolako Erriberak haurreskolak. Guztira, 175 plaza berri gehituko zaizkio, beraz, sare publikoari.

Bestalde, Eusko Jaurlaritzak jakinarazi du Bilboko Zamakola eta Elejabarri auzoetan haurreskolak handitzeko eta egokitzeko lanek aurrera jarraitzen dutela. Helburua da familien beharrei erantzutea eta 0 eta 2 urte bitarteko haurrentzako hezkuntza publikoaren eskaintza indartzen jarraitzea.