Ostegun Gizen egun honek hasiera emango dio aurtengo aratuste edo inauteri jaiei. Ume, gazte eta heldu ugarik aprobetxatuko dituzte ondorengo egunak, mozorroa jantzi eta kalera irteteko. Baina zein onura dauzka mozorrotzeak umearengan? Zer ematen die? Komeni da urteko beste egun batzuetan ere halakoak jantzita ibiltzea? Sara Tarres psikologoak bere blogera eramandakoak ekarri ditugu txoko honetara, interesgarri egingo zaizuelakoan.

Zalantzarik gabe, profesionalak dio ona dela haurrak urte osoan mozorrotzera jolastea, ez bakarrik data hauetan. Ume askori gustatzen zaie mozorrotzea; zapi pirata janztea edota makila magiko bat hartzea. Denak, ia salbuespenik gabe, euren ipuin, komiki edo telesail gogokoenetako pertsonaia izatera jolasteak erakartzen dituela adierazi du Tarresek.

Mozorrotzearen onurak

Zein onura dakartza haurtzaroan mozorrotzeak? Haur bat mozorrotzen denean, beste pertsona edo pertsonaia bat irudikatzen du, benetakoa edo irudizkoa, eta haren keinuak, izateko era eta munduarekin elkar-eragiteko modua interpretatzen ditu. Horrela, izatera jolastuz, bere irudimen, hizkuntza eta trebetasun sozial guztiak aktibatzen eta hedatzen ditu, bestela bigarren maila batean geratuko liratekeenak edo erakustera ausartuko ez liratekeenak.

Hauek izan daitezke mozorrotzeak dakartzan onurak:

  • Sormena sustatzen da.
  • Irudimena aktibatzen da.
  • Irudimenezko edo benetako munduak eta egoerak sortzea sustatzen da, gizarte eta hizkuntza-trebetasunak adieraztea errazten dutenak.
  • Enpatia garatzen da, beste baten lekuan jartzeko eta bere sentimenduak ulertzeko gaitasuna eskainiz.
  • Nahi duen pertsonaia izateko jolastuz eta mozorrotuz, seme-alabei lagun diezaiekegu beren nortasuna esploratzen eta erronka berriei aurre egiten.
  • Tentsioak askatzeko eta sentimenduak adierazteko aukera ematen du, modu erraz, ludiko eta ia inkontzientean.
  • Haur bat mozorrotzen denean, une horretan izan nahi duen pertsonaia izatea aukeratuz, bere burua askatasunez adierazten ikasten ari da, bera izanik ziurrenik pentsamendu sinbolikoa martxan jarriz egingo ez lituzkeen gauzak egiten.

Psikologoak gomendatzen du kutxa batean gordetzea mozorro bat sortzeko interesgarriak izan daitezkeen gauza guztiak; lumak, zintak, katu-belarriak, pintore-txapelak, mantalak, etab… Izan ere, mozorrotzea metodo bikaina dela dio haurrek beren kezkak, pentsamenduak eta sentimenduak adierazteko, eta horrek gure txikien garapen kognitiboa eta emozionala indartzen laguntzen dutela azpimarratu du.

Beraz, disfrutatu aratuste edo inauterietan eta baita urteko gainontzeko egunetan mozorrotuta ere!