Martxoaren 26an Baztanen jardunaldia antolatu dute Herri antolamendua herri hezitzailearen ikuspegitik izenburupean. 2021 urte hasieran, urteetan bizitako esperientzietatik eraikitzen joandako diskurtsoak, “hirigintzakoa eta hezkuntzakoa, bateratu, elkar elikatu eta elkarrekin aberasteko saiakera bat” egiteko gogoz, Hiritik At eta Oinherriko kideak harremanetan jarri ziren. Atzo, Andoainen, bide horrek emandako liburuxka oinarri izango duen eta martxorako Baztanen antolatu duten jardunaldia aurkeztu zuten.

Oinherrik, hezkuntza modu “zabalago eta integralago” batean ulertzeko, herri hezitzailearen filosofia haurtzaroaren kulturatik eta parte hartzetik eraiki nahian, oso argi dauka herria badela hezkuntzarako “eduki, testuinguru eta eragile”. Hiritik At-ek aldiz, herri antolamendua eraldatuz, “harreman parekideagoak, osasuntsuagoak, jasangarriagoak eta bizigarriagoak” eraikitzen dihardu, hirigintza eraldatzailea sustatuz.

Hezkuntza eta hirigintza, lehen begiradan elkarrengandik urrun egon daitezkeen bi lan-arlo direla iruditu arren, azpimarratu nahi izan dute etengabeko elkarreraginean daudela.

Liburuxka

Urtebeteko lanketa kolektibo baten ostean, Herri antolamendua herri hezitzailearen ikuspegitik izeneko liburuxka sortu dute. Eta bertan jasotakoen inguruan hausnartzeko eta bertan proposatzen dituzten esperientziak ezagutzera emateko, jardunaldi batzuk antolatu dituzte, Udalbiltzaren laguntzarekin.

Jardunaldiak, martxoan

Martxoaren 26an, Baztanen, Lekarozen, egingo dituzte jardunaldiak. Horien helburua da “herri antolamendua hezkuntzatik eraikitzeko marko teoriko zein praktiko bat proposatzea”. 09:30etatik 17:30era bitarteko egitaraua prestatu dute eta azaldu dute Euskal Herri hezitzailea dutela amets, eta jardunaldi honekin norabide horretan urrats gehiago emateko ekarpena egin nahi dutela. 09:30etatik 17:30etara bitarteko egitaraua prestatu dute.

10:00etatik aurrera, esaterako, hiru esperientzia ezagutzeko aukera eskainiko dute; Baztan hobetzen, Bizi Bizia proiektua eta ertzetik erdira, espazioen antolaketa auzolanez.

12:00etan Gure herriek zaintzen al dute? izenburupean, elkarrizketatiko dute Denise Najmanovich argentinar antropologa.

Eta 15:30ean mahai-ingurua egingo dute Hirigintza eraldatzailea, diskurtsotik praktikara izenburupean.

Martxoaren 21era bitartean eman ahal izango da izena bertan parte hartzeko.