HAZI HEZI aldizkariak udaberri honetan hamar urte bete ditu eta urteurrena ospatzeko gogoz daude. Igandean egingo dute jai herrikoia Adunan , guk Ainara Gorostizu Hazi Hezi aldizkariko koordinatzailearekin hitz egin dugu, egitarauaren berri izateko.

HAZI HEZI Hik Hasi egitasmo pedagogikoak sorturiko haziera eta heziketa gaiei buruzko aldizkaria da, familiei eta hezitzaileei zuzendua. Euskara  hutsezko aldizkari espezializatu batek hamar urte egitea bera ospatzeko arrazoi nahikoa iruditzen zaie, eta gainera, oraingo honetan aldizkaria eraberritu egin dute, formatu arinago eta ikusgarriagoan eman nahi izan diete irakurleei eta harpideei, eta eraberritze hori ere ospatu egin nahi dutela esan digute.

“Jai ireki bat egingo dugu, hil honen 29an, igandez, hemen Adunan. HAZI HEZIren hamar urteko ibilbidean lagun izan ditugun hainbat pertsonarekin egingo dugu festa. 11:30ean Alaia Martinek emango dio hasiera festari, agurreko bertsoekin. Alaia HAZI HEZI berri honetako erredaktore kolaboratzaile izan da gainera. Ondoren, beste bi bidelagunek hartuko dute parte: Batetik,  Nerea Mendizabal psikopedagogoak hezitzaile eta gurasoentzako hitzaldi bat eskainiko du eta, aldi berean, Alazne Ugartetxea irakasleak eskulanak egingo ditu umeekin. Festari amaiera emateko Porrotxek eta Marimototsek ikuskizuna eskainiko digute. Goiz pasa hau ordu biak aldera bukatuko dugu.“

Tartean HAZI HEZIren funtsa ere aurkeztuko dute: “Duela hamar urte, irakasleen, gurasoen, psikologoen eskariz sortu genuen aldizkari hau, haurraren hazierari, garapenari eta hezikeetari buruzko galdera askori erantzun ezinda zebiltzalako familia eta hezitzaile asko. Eta ordutik, Euskal Herriko aditu eta irakasle kontsagratu talde zabal baten galbahetik pasatako informazio kontrastatua, modu arinean, ematen saiatu gara. “

Urtean lau aldizkari argitaratzen dituzte , eta 20 euroko harpidetzarekin etxean jaso daiteke.