Hazkuntza gutxietsita dago, eta egun ez dago benetako erantzukidetasunik, edo oso-oso minoritarioa da

Iñaki Kasaresek gidatu zuen abenduaren 10ean hazkuntza eta erantzukidetzari buruzko jarduera. Hamar lagunek hartu zuten parte; sei gizonek eta lau emakumek. Talde txikia Kasaresek Gizonezko izeneko blogean adierazi duenez, baina gogoeta interesgarri ugari utzi zituena. Interesgarria iruditu zaigu eta Kasaresek blogean egindako laburpena ekarri dugu gurera.

Zailtasunak eta oztopoak

“Hazkuntzan, guraso eta, oro har haurren tutoreek izaten ditugun zailtasunei begiratu genien, nork bere bizipenetatik abiatuta”, adierazi du Kasaresek. “Ikusi genuen zailtasunak handiak direla, eta gurasoen bizimodua askotan gogor samarra dela”.

Ondorioetako bat izan zen hazkuntza egokia garatzeko oztopo estrukturalak eta pertsonalak daudela. Aipatutakoen artean egungo sistema sozioekonomikoan hazkuntza gutxietsita dagoela nabarmendu zen, baita jarduera pribatutzat hartzeak ez diola mesederik egiten ere.

Zailtasun pertsonalei dagozkienez, hazkuntza jarduera estresagarria dela azpimarratu zuten bertaratutakoek: erabakiak etengabe hartu beharra, emozioak pil-pilean edukitzea… Egungo soldatapeko lan munduaren antolaketa eta hazkuntzaren arteko talka ere aipatu zen, eta horren ondorioz, lehentasunak erabaki beharra izatea —nork bere egoeraren arabera—.

Laguntza instituzionalak ez-nahikoak direla argi eta garbi geratu zen. Hala, ondorioetako bat izan zen nork bere inguruan eraiki behar duela laguntza-sarea: lagunekin, senideekin, beste gurasoekin, etab. Azken finean, mikrokomunitateen beharra dagoela.

Prestakuntza eskasa

Gurasoek prestakuntza eskasa dutela ere aipatu zen Gasteizko jardunaldian. “Egungo egoerari egokituta ez dauden iraganeko erreferentziek ez dute balio”, adierazi zuten. Gizonezkoek bereziki azpimarratutakoak izan ziren erreferentzia eza, ingurukoen presioa —esaterako, lanaldia murrizteko— eta gaiarekin lotuta emakumezkoekin sortzen diren gatazkak emakume batzuei gogor egiten baitzaie hazkuntzaren ardura gizonen esku uztea.

Erantzukidetasuna

“Egun ez dago benetako erantzukidetasunik, edo oso-oso minoritarioa da, andrazkoek jarraitzen baitute izaten zaintza- eta hazkuntza-lanez arduratzen direnak, eta alde handiz gainera”. Antolakuntza sozioekonomikoak zaildu egiten du erantzukidetza eta gizonei begirako politiken beharra azpimarratu zuten. Baita nork bere inguruko gizonekin egin beharreko lana ere.

Artikulua osorik hemen.