Haurtzaroa eta gozokiak; debekatu baino hobe da kontsumoa dosifikatzea
Komeni da haur txikiek egun eta ospakizun bereziekin lotzea gozokien kontsumoa.
Maria Jose Roldan psikologoak argi dauka: gozokiak kaltegarriak dira. Entrepadres atarian hainbat aholku eman ditu seme-alaben gozoki kontsumoaren inguruan kezka duten gurasoendako. “Kaloria hutsalak ekartzen dituzte, gosea kentzen dute, ez dute organismoa elikatzen, gizendu egiten dute eta txantxarrak sortzen dituzte”.
Hori esanda debekurik ez ezartzeko gomendatzen du: “Debekuek ez dute funtzionatzen. Umeari sortuko zaizkio gozokiak kontsumitzeko aukerak —lagunekin, ospakizunetan…—, eta debekuaren ondorioz abagune horietan neurriz kanpo kontsumitzera hel daiteke”.
Dosifikatu kontsumoa
Gozoki kontsumoa neurtu egin behar da, dosifikatu. Lehenengo eta behin komeni da kontsumoa atzeratzea. “Umeak ez baditu gozokiak ezagutzen ez ditu faltan botako”, dio Roldanek. “Behin ezagutzen dituenean komeni dena da gozokien kontsumoa egun bereziekin lotzea: domekak, ospakizun bereziak…”. Hiru gozoki aldiro neurri polita da goserik ez kentzeko eta urdaila ez kaltetzeko. Txantxarrei aurre egiteko komeni da umeak gozokiak ez hozkatzea baizik eta txupatzea. Gehiago iraungo dute eta arrasto gutxiago utziko dute haginetan. Komeni da, baita ere, ondotik hortzak ondo garbitzea.