Nerabeak arrisku-taldea dira; EHUk ikerketa bat egin du gaiaren inguruan.
Gehiegizko pisuaren eta obesitatearen prebalentzia nabarmen handitu da azken urteetan nerabeen artean, eta, horren ondorioz, baita haiekin lortutako arazoak ere. EHUko azterketa baten arabera dietan gantz-portzentaje handiegia hartzeak sabelaldean gantz gehiago metatzea eragiten du. Berdin du kontsumitutako kaloria kopurua eta egindako jarduera fisikoa zein den. “Orain arte uste zen ariketa asko egiteak nolabait konpentsatu egiten zuela dieta desorekatua. Azterketa honen bidez frogatu dugu ez dela hala”, azaldu du Idoia Labayen EHUko ikertzaileak.
Adituek diotenez sabelaldean gertatzen den gantz-metaketa da arriskutsuena osasunerako, arazo kardiobaskularrak, diabetes mellitusa, hipertentsio arteriala, hiperkolesterolemia eta abar izateko arriskua handitzen baititu.
Ez zegoen aurretiazko lanik dietaren osaera eta sabelaldean gantz gehiegi izatea elkarrekin erlazionatzen zituztenik nerabezaroa bezalako garapen-aldi kritikoan. “Arrisku-taldea dira sasoi horretan beren erabakiak hartzen hasten direlako jan nahi duten eta jan nahi ez dutenari buruz, eta, era berean, askok kirola egiteari uzten diotelako”, esan du Labayenek.
Gantza, faktore garrantzitsua
Finkatutako helburuak ikertzeko, 224 nerabez osaturiko azpilagin bat aztertu zuten EHUko ikerlariek. Zehaztasunez neurtu zen gazteen sabelaldeko gantza X izpien bidezko absortziometria duala baliatuta. Gazteen ohitura dietetikoak eta jarduera fisikoa ere aintzat hartu ziren.
Azterketa honetako emaitzek argi frogatzen dute dietaren gantz-portzentajea estuki lotuta dagoela sabelaldeko gizentasuna handitzearekin, eta, gainera, erlazio hori ez dagoela nerabeek egiten duten jarduera fisikoaren mailaren mende. Kontuan hartzeko ondorioa, zalantzarik gabe.