Uztailaren 1ean, Errenterin “Herri bat hezkuntzatik eraikitzen” izenburupean jardunaldia burutuko da. Berau aurkeztu zuten atzo antolatzaileek Lekuona eraikinean.

Oinherri herri hezitzaileen egitasmoa modu teoriko zein praktikoan garatzea helburu duen EH mailako kultura, aisia, euskara eta hezkuntza arloko 16 eragilek osatzen dute. Herri hezitzaileen filosofia herrietan nola egikaritzen den lantzeko, herri hezitzaileen sarea sustatzen ari dira EH mailako 25 bat udalekin.

Pasa den urtean Durangon burutu zituzten jardunaldietan, herri hezitzaileen sareko herri hauen erronkak jaso zituzten. Ikasturte honetan erronka horietan aurrera pausoak emateko bide berriak urratzen ari dira, eta horretarako lau lan ildo zehaztu dituzte.

Pasa den otsailean abiapuntu moduan eskola kirola eraldatzen jardunaldia burutu zuten eta ordutik kide ezberdinez osatutako foro iraunkor bat dute eratuta. Aurrerago gazteen parte hartzea eta espazioen eraldaketan sakonduko duten arren, atzo maiatzaren 31an bigarren mugarriaren aurkezpena egin zuten. “Herri bat hezkuntzatik eraikitzen” izenburupean antolatu duten jardunaldia hain zuzen ere. Jardunaldi honen muina aniztasunaren aurrean estrategia isolatuetatik herri estrategia bateratuetara pasatzeko beharra azaleratzean datza. Hau aurrera eramateko zenbait bidelagun izango dituzte, horien artean, Errenteriako Udala.

Errenteriako Udalak urrats berri bat herri hezitzailearen bidean

Errenteriako Udalak urteak daramatza hezkuntza politika publikoak Udal jardunaren erdigunean kokatzeko ahaleginean. Horren adierazle da Udal Eskola Kontseiluaren jarduna, herriko derrigorrezko hezkuntzako zentroekin garatzen ari den “erantzukidetasunean sakonduz, hezkuntza komunitatea saretu” deritzon prozesua eta bide horretan burututako hezkuntzaren diagnostiko partekatua. Ekimen hauen helburu nagusia, herriko hezkuntzaren argazki partekatu batetik abiatuta, hezkuntza politika bateratuak diseinatu eta garatzea da.

Herri bat eraikitzerako orduan ezinbesteko ardatza da hezkuntza. Gure kasuan, are gehiago esatera ausartuko ginateke, gureak ez diren hezkuntza sistemak baitauzkagu. Hori horrela, Oinherri herri hezitzaileak sustatzeko elkartetik gure ekarpentxoa egin nahi dute gai honetan. Herri hezitzaileen egitasmoak hezkuntza modu integralago batean ulertzeko eta, herriko hezkuntza komunitateak saretzeko aukera erreala eskaintzen dituelakoan.

Norabide honetan, Oinherrin argi dute hezkuntzaren eskumenek deszentralizazio prozesu bat behar dutela. Eta Udalek gai honetan protagonismo handiagoa hartzen joan beharko luketela, tokian tokiko herri hezitzaileak sustatzeko, auzolanean behetik gorako eraikuntza prozesu anitz eta zabalak sustatzeko.

Oinherritik sustatzen ari diren herri hezitzaileen sareko herri guztietan behin eta berriz errepikatzen den kezketako bat hezkuntzarena da. Egun, oraindik ere gure herrietan dauzkagun hezkuntza formaleko sare ezberdinen arteko gatazkak gainditzeko beharra eta elkarrekin herri ikuspegia landuko duen hezkuntza proiektuak garatzeko gogo eta ilusioa nabarmenak dira. Behar honetatik habiatuta sortu dute beraz “HERRI BAT HEZKUNTZATIK ERAIKITZEN” jardunaldia.

2021eko uztailaren 1ean Errenterian Oinherrik Euskal Herriko hezkuntza komunitateko eragile ezberdinak bildu nahi dituzte egun osoko jardunaldi batean. Bertan, hezkuntza herri hezitzaileen ikuspegitik zer-nola ikusten duten azaldu eta hezkuntza ulertzeko modu honek herriko hezkuntza proiektu integralak garatzeko egin dezakeen ekarpena lantzea lirateke helburu nagusiak.

Hona hemen jarduladiko egitaraua

9:30-10:00– Harrera

10:00-10:30 Hik Hasik 2017an plazaratu zuen hezkuntza proposamena eta (H)arian prozesuak emandakoen arteko gakoak azalduko dizkigu Nora Salbotxek.

10:30-11:30 Errenterian azken urteetan hezkuntza komunitatearekin burutu duten lanketa ezagutzera eman eta balioan jarri nahiko genuke jardunaldi hauetan, gainontzeko herriei ere gaia lantzeko helduleku batzuk eskaintzeko. Itziar Ostolaza Galdos

11:30-12:00 Atsedenaldia

12:00-13:00 Hezkuntzaren eskumena deszentralitzako beharraren inguruan sakontzeko Kataluniako VIC herriko arduradunak gonbidatuko ditugu beraien prozesua azal dezaten. Elisabet Franquesa I Roca eta Glòria Cunill Vilalta

13:00-13:30 Galderentzako tartea

13:30-15:30 Bazkaltzeko tartea

15:30-17:30 Ertz ezberdinetatik eragin eta eraiki mahaingurua/ partehartzaileak aste honetan iragarriko ditugu ADI SAREEI!

Azkenik jardunaldietan parte hartzeko izena eman beharko da jarraian aurki daitekeen loturan.  Herri hezitzaileen sareko kide diren herrietako herritarrek ez dute matrikularik ordaindu beharko (izen emate galdetegian zehazten dira zein herri dauden sarearen baitan), gainontzeko guztiek 35 euroko ordainketa burutu beharko dute. Izen ematea formalizatzeko klikatu hemen