Ndank Ndank elkarteak bi formakuntza saio antolatu ditu Bergaran. Horien helburua izan da arrazakeriaren aurrean eguneroko praktikak berrikustea, zalantzan jartzea eta eraldatzeko tresnak eskaintzea. Haien esanetan praktika horiek beharrezkoak dira “geroz eta polarizatuagoa den eta diskurtso arrazistez betetzen ari den gizarte honetan”.

Senegaldarrez eta euskaldunez osatutako elkarteak, bi komunitateen arteko elkarrekintza eta komunikazioa bultzatzen du, arrazakeriaren aurka agertuta eta kulturartekotasunaren aldeko balioa aldarrikatuta: “Ez da erru kontua, ardura kontua baizik. Gizarte justuago eta berdinzaleago bat eraikitzeko, ezinbestekoa da norbere pribilegioak eta ohiturak aztertzea, eta ekintzara pasatzea”.

Hezkuntza antirrazista hausnartzen

Bigarren formakuntza saioan Amaia Jackson, Leyao Rovira eta Hajar Samadi elkartu dira eta arrazakeria izan dute hizpide. Ondoren, Elene Mengyu Larrinagaren Hogeitabat film laburra proiektatu dute.

Formakuntza hori hezkuntza komunitateari zuzenduta egon da: gurasoei, hezitzaileei, irakasleei eta aisialdiko eragileei. “Hitzaldiaren abiapuntua da guztiok hezi gaituztela gizarte arrazista batean, eta, ondorioz, denok daukagu zer ikasi eta zer desikasi”, adierazi dute.

Egunerokoan agertzen diren diskurtso arrazistak identifikatu dituzte, baita horiei aurre egiteko estrategia pedagogikoak ere; hau da, “pentsamendu kritikoa, enpatia eta justizia soziala” landu dituzte.