Haurrak modu positiboan haztea eta garatzea du helburu hezkuntza positiboak. Jane Nelsenek garatu zuen, eta Alfred Adlerr eta Rufus Dreikus, bi psikologo humanista horien lanean dago oinarrituta.

Alvaro Bilbao psikologo, neuropsikologo eta psikoterapeutak dio ez dela psikologia edo pedagogia bezalako zientzia formala, baina ikerketa zientifiko askotan oinarrituta dagoela hezkuntza positiboa. Gaineratzen du oinarrian dauden teoriak “sendoak” direla eta ikerketa zientifiko ugarik erakutsi dutela irakasten dituen printzipioek “onura ugari” dakartzatela bai haurrentzat eta baita gurasoentzat ere.

Haur guztiek modu positiboan garatzeko ahalmena dutela du oinarrian hezkuntza positiboak eta hauek dira printzipioak: irmotasunetik eta errespetutik laguntzea, besteekiko errespetuz jokatzen duten pertsona gisa gara daitezen, beren buruaz arduratsu eta modu positiboan moldatzeko eta bizi diren gizartean beren helburuak lortzeko baliabideekin.

Zein onura dauzka haurrendako?

Bilbaok dio oihurik eta zigorrik gabe heztea ideia ona dela beti, badakigulako zigorrek eta mehatxuek eragin negatiboa dutela haien autoestimuan eta konfiantzan, eta, gainera, ez direla batere eraginkorrak haurrek ikas dezaten. Gainera, hezkuntza positiboarekin errespetuz eta afektuz hezteak onura handiak dakarzkie haurrei. Zerrenda hau egiten du profesionalak:

  • Trebetasunak eta arauak ikastea errazten du.
  • Haurra balioetsia senti dadin laguntzen du.
  • Haurra garrantzitsu sentitzen laguntzen du.
  • Autokontrola garatzeko aukera ematen du.
  • Balio positiboak eskuratzen laguntzen du.

Bost oinarri

Hezkuntza positiboak helduei adeitasuna eta irmotasuna erabiltzen irakasten die. Hauek dira oinarrizko bost zutabe:

  • Elkarrenganako errespetua. Helduek irmotasuna berresten dute beren burua errespetatzean. Eta hori adeitasunez eta haurraren beharrak errespetatuz egiten baditugu, heziketa on baten lehen zutabea izango dugu.
  • Akatsetatik ikasten. Akatsak hezteko aukera bat dira. Horretarako, lehenik eta behin portaera horrek ezkutatzen duen sinesmena identifikatu behar da. Hezkuntza eraginkorra da haurrak modu jakin batean jardutera bultzatzen dituzten arrazoiak bilatzen dituena eta arrazoi horien gainean lan egiten duena, sinesmena aldatzeko, portaera soilik aldatzen saiatu beharrean.
  • Zigorrik gabe. Irakasten duen hezkuntza ez da ez permisiboa ezta zigortzailea ere. Diziplina positiboak konponbideetan zentratzera bultzatzen du, zigorrak erabili beharrean. Zigorra eraginkorra da epe laburrera, baina ondorio negatiboak ditu epe luzera. Ezagutu zigorraren alternatibak.
  • Komunikazio eraginkorra eta arazoak konpontzeko trebetasunak, komunitate-zentzua sustatuko du eta haurrarekin “konektatzeko” aukera eskainiko du.
  • Keinu pozgarriak –laudorioen ordez–. Animatzen dugunean, arreta jartzen diogu ahaleginari eta hobekuntzari, ez arrakastari soilik. Horrek autoestimua indartu eta estimulatu egiten du. Ezinbestekoa da trebetasun baliotsuak irakastea izaera on baterako.