Eskoriatzatik irtenda eta Gatz Bidea jarraituz ordubete inguruko ibilalditxoa egiteko proposamenarekin gatoz gaurkoan. Hori izango da Leintz Gatzaga herrira oinez iristeko beharko dugun denbora.

Eskoriatzatik Arlaban aldera egiteko dagoen biribilgune inguruan aparkatzea gomendatzen dugu. Herrigunea amaitzen den lekuan badaude aparkalekuak.

Inguru horretatik abiatzen da oinezkoentzako den Gatz Bidea. Basoak eta belardiak zeharkatuko ditugu errepidearen trazatua jarraituz gutxi gorabehera.

Herri ederra da Leintz Gatzaga. Erdi aroko altxor asko gordetzen ditu eta erdigunea oso handia ez bada ere xamar handia du. Bertan aurkituko dituzue, gainera, bisitagarriak diren Gatz Museoa edota Dorletako santutegia.

Gatz iturria herritik 250 metrotara dago, Dorletako gaztelu zaharraren ondoan.

Ibilalditxoa gehiago luzatu nahi izanez gero aukera dago Deba ibaiaren iturburua den Hiruerreketa ingurura arte igotzeko. Leintz Gatzagatik Gatzagainera igo behar da eta bertatik Hiruerreketa ingurura.

Hain zuzen ere puntu horretan egiten dute bat hiru errekak. Sortu berria den Deba errekak zein Isuskitza eta Usokohaitzako errekek.

Puntu horretatik behera Deba ibaiaren ur emaria handitzen doa. Leintz Gatzagan bertan beste zazpi errekaren emariak hartzen ditu eta Eskoriatzatik behera askoz ere gehiago Deban itsasoratzen den arte.

Hiruerreketa izeneko parajeak ezaugarri interesgarri asko ditu. Jakinekoa da erromatarrak heldu zirela bertaraino; izan ere, aztarnak aurkitu dituzte. Jakinekoa da baita ere 1.100. urtetik aurrera erromesen elkargunea zela Santizahar izeneko parajea.

Aniztasun handiko ingurua da. Zuhaitz mota asko ditu basoak, eta aroak modu oso berezian nabaritzen dira.