Manex San Sebastian marrazkilariak ondu du 50 kartaz osatutako jokoa, eta Laboratoriumen eskuratu daiteke. Bergarako historia ezagutzeko “modu dibertigarri eta dibulgatzailea” dela diote sustatzaileek. Aurrerantzean, horrenbestez, “Bergarako ondarearen erakusle den karta-joko propioa” izango du Laboratoriumek, “Bergarari, Seminarioari eta museoak berak gordeta duen ondare historikoari” buruzkoa, Rosa Errazkinek, Laboratorium Museoko zuzendariak, adierazi duenez. “Karta-joko honek aukera ematen du Bergarako historiako gertaera batzuk ezagutzera emateko, protagonista ezagunak eta asmazioak, beste modu baten bidez; kasu honetan, karta-joko batekin”.

Publiko orokorrari zuzendua

Errazkinek gaineratu du publiko orokorrari ere zuzenduta dagoela jokoa, eta helburu dutela “modu dibertigarri eta dibulgatzaile batean” ezagutaraztea historia: “Gazteenek herriaren historia modu ludiko batean ezagutuko dute, eta nagusiagoek gertakariak gogoratuko dituzte”.

Manex San Sebastian ilustratzaile donostiarrak ondu du karta-jokoa, eta, aurkezpenean azaldu duenez, “oso pozik” dago emaitzarekin: “Urtebete inguruko prozesua izan da: Rosa ezagutu nuen unean proposatu nion ideia, eta hitz egitearekin batera hasi ginen zehazten zenbat karta egingo genituen, zeintzuk izango ziren…”. Hala, azkenean, gertaera, pertsonaia edo asmazio ezberdinak dituzten 50 kartaz osatutako jokoa sortu dute: “Helburua da karta horiekin guztiekin denbora lerro bat osatzea: txanda bakoitzean nork bere karta jarri beharko du, eta karta guztiak lehenengo jartzen dituenak irabazi egingo du”.

Albistea osorik: Goiena.eus