Uda sasoia badator, eta asko eta asko izango dira aurten ere, hondartzan, bertako hondarrarekin jolasean orduak pasako dituzten umeak. Irudimena martxan jarri eta gazteluak, animaliak, izozkiak edota bestelako irudi ugari egingo dituzte askok, seguru.

Euskal Herrian hondarrarekin lan egiten duen eskultore bakarrenetarikoa da, bakarra ez bada, Andoni Bastarrika. Eta gainera, herriz herri, umeei zuzendutako tailerrak eskaintzen ditu, hondarra nola landu eta horrekin nola disfrutatu irakasten.

Bastarrikak dio umeari “on” egiten diola hondarrarekin jolasteak, irudimena edota lasaitasuna lantzeko aukera ematen duelako, besteak beste. Gaineratu du, zazpi urtetik gorakoekin lan politak egin daitezkeela.

Hasteko, hondarrari nahi dugun irudiaren forma emateko, garrantzitsua da hondarra zapaltzea, eskuarekin zaplada txikiak emanez. Hala, hondarra gogortu egingo da.

Gero, hondarretan aurki daitekeen luma bat hartu eta guztiaren gainetik pasatzea gomendatzen du. Eta ondoren, nahi dugun horren itxura hartzen joan dadin, makila batekin guztia profilatu behar da. Soberan gelditzen doan hondarra, albo batera mugitzeko gomendatzen du, irudia geroz eta hobeto ikusten joan dadin, eta umea hori ikusiaz, gehiago motibatu dadin.

Esaterako, dortoka bat marraztu nahi bada, makilarekin oskola marrazten joatea gomendatzen du Bastarrikak. Edo krokodilo baten kasuan, azala marraztea.

Irudiari bizia emateko, begietan kanikak edota hondartzan bertan aurkitutako harriak jar daitezke.

Hori guztia eta gehiago, ondo lantzeko aukera eskaintzen du Bastarrikak, herriz herri eskaintzen dituen tailerretan: “Ume batzuk segidan aspertzen dira, ez dakitelako zer egin. Beste batzuk zerbait egiten hasten dira segidan, eta blokeatuta gelditzen direnak ere egoten dira tailerretan. Batzuk lotsatiagoak izaten dira, beste batzuk berriz, irekiagoak. Baina guztiei onena ateratzen saiatzen naiz, talde lanaren garrantzia azpimarratuz lehenengo. Eta nahiz eta gehienetan irudiak presaka lantzen hasten diren, lasaitasuna transmititzen saiatzen naiz. Batzuk pazientzia zeharo galtzen dute eta segidan zapuzten dira. Baina etxetik animalien argazkiak eramaten ditut, horiek umeen aurrean jarri eta argazkiari begiratzeko eskatzen diet, bertan ikusitakoak gero hondarrarekin egin dezaten”, azaldu du Bastarrikak.

Hondarra, magia dela gaineratu du eskultoreak, eta pantailen erabileraz gain, horrelakoak egiteak burmuinean beste gauza batzuk garatzeko aukera ematen duela adierazi du.

Hondartzak dituzten herrietan, horietan egin izan ditu tailer gehienak. Eta barnealdeko herrietara berriz, berak eramaten du furgonetan hondarra. Iaz, COVID-19agatik, asko jaitsi zitzaizkion tailerrak, eta aurtengoa ere ez da erraza izango eskultorearentzat. Baina Bergaran, Zumaian, Zarautzen, Orion, Mutrikun, Zumarragan, Zestoan, Eskoriatzan edota Oñatin egin izan ditu tailerrak, eta horrelako gehiago eskaintzeko deseatzen dago Bastarrika.

Berak ere, bere lanak egin eta ikusgai jartzen ditu Zarauzko malekoian. Zazpi bat urtetan egon izan da. Iaz ezin izan zuen baimenik lortu pandemiagatik, eta aurtengo baimena eskatuta dauka, baina erantzunaren zain dago oraindik.