Oiartzungo Abaraxka ludotekako lagunek haur eta nerabeekin lehen sorospenak lantzeko bideoa argitaratu dute. “ikusi ikusi han…” abestiaren doinuarekin egoera larri batean nola jokatu behar dugun azaltzen da bertan. Beraiekin bitz egin dugu egitasmo honen nondik norakoak ezagutzeko.

Haur eta nerabeekin lehen sorospenak lantzeko beharra ikusi duzue? Uste dut txiki txikitandik, beste hainbat gai bezalaxe, lehen sorospenak landu behar direla haurrekin. Are gehiago esango nuke herri osoarekin landu behar direla. Norberaren, inguruaren, lagunaren, komunitatearen, ezezagunaren… zaintza dago erdigunean eta lehen sorospenak horretarako baliatu behar dira. Guk gure Abaraxka ludotekan garrantzi handia ematen diogu  elkar zaintzari. 

Askotan, larrialdi egoeretan ez ditugu pertsona baliagarri moduan ikusten … Uste dut haurrak ez ditugula pertsona baliagarri moduan ikusten egoera eta gauza askotan. Oraindik ere tamalez ez ditugu herritar aktibo bezala kontsideratzen, kosta egiten zaigu beraien ahotsa, iritzia entzutea. Nik uste dut ikaragarrizko gaitasuna, balioa dutela, baina aukerak eman behar zaizkie eta beraiengan sinistu behar dugu. Nolanahi baikorra naiz eta honen inguruan aldaketa handiak ematen ari garela.

Nola landu duzue gaia? Aurtengo udaran COVID19 dela eta udalekuen antzeko zerbait egin dugu herrian, Larrialdi Zaintza Zerbitzua deitu diogu. Kontua da, bigarren asterako haurrak etxera bidali eta dena bertan behera uzteko eskatu zigutela baina begiraleak lanean jarraitu dugu material eta baliabide ezberdinak sortzen. Tartean lehen sorospenetako materiala. Herrian udaltzainez, erizainez, sendagilez, suhiltzailez…. osaturiko Bizilagun deitzen den talde bat badago. Hauen helburua herritarrei lehen sorospenen berpiztea eta arrisku egoerak kudeatzeko gaitasunak sortu eta iraskastea da. Gure begiraleen artean berriz, erizainak,musikariak marrazkilariak… Hauek taldetxo bat sortu eta gaia landu dute.  Beraz denon artean eta bizilagun taldearekin kontrastatuta landu eta sortu dugu materiala.

Ze baliabide sortu dituzue?

  • Abestia:Ikusi ikusi han abestiari letra aldatu diogu eta lehen sorospenetara hurbiltzen gaituen abesti bat sortu dugu.
  • Bideoa: Abesti hau, bideoan ere grabatu dugu bisualki haurrek zer egin behar den ikus dezaten.
  • Karaokea: Bideoari letra jarri diogu, karaoke moduan.
  • Ipuina: Haurrek lehen sorospenez gain hainbat telefono zenbaki  (112, herriko udaltzaiak eta herriko osasun etxea) ikas ditzaten ipuin bat sortu dugu. Ipuin hau koloreztatua eta txuri beltzean ere atera dugu, haurrak berak nahi modura koloreztatzeko aukera emanez.
  • Ahotsa: Ipuinari ahotsa ere jarri diogu.

Materiala gure www.gazteoiartzun.net zintzilikatzeaz gain, herriko bi ikastetxetan zabaldu dugu eta baita lehen aipatutako Bizilagun taldearekin.   

Material guzti honen helburua haurrak lehen sorospenetara modu jostagarri eta erraz batean  hurbiltzea da,  horrelako egoera batean aurkitzen badira zer egin behar duten jakitea eta hainbat telefono zenbaki ikastea. 

Abaraxka ludotekan aisialdia hezitzailea dela sinesten dugu eta herriarekin bat eginik lana egiten saiatzen gara. Beraz, sortu dugun materiala komunitatean zabaldu nahi dugu norbaitentzat baliogarria izango delakoan.

Jaso gure ziztada goxua!

Ludotekako hezitzaileak.