Oñatiko Udalak eta herriko hiru ikastetxeek Oñatiko kultur ondarearen transmisioa bermatzeko egitasmoari ekingo diote. Aurrerantzean, transmisioa hezkuntza nahiz gizarte mailan lantzeko bitartekoak sortuko dituzte.

2015ean abiatu zuten Oñatin Hurretik egitasmoa, belaunaldi gazteek herriari buruz jakin beharko luketena zehazteko eta ezagutza horren transmisioa bermatzeko. Horretarako, beharrezko bitartekoak sortzea eta ezagutza birsortu, dinamizatu eta biziberritzeko helburua dute Udalak eta ikastetxeek .

Hilabete honetan, akordioa berretsi eta sinatu dute, eta Hurretik proiektuarekiko hainbat konpromiso hartu dituzte: Udalak eta ikastetxeek sortutako material didaktikoa Herri Curriculum proiektuan eta ikasgaietako programazioan txertatzea eta gutxienez urtean behin bilduko den jarraipen batzordea osatzea.

Hezkuntzara eta herrira bideratutako asmoa

Proiektuak bi alor dituela azaldu dute: bat hezkuntzari lotutakoa eta bestea herritar orori zuzendutakoa. Alaitz Kortabarria Oñatiko Hezkuntza zinegotziaren esanetan, Hurretik egitasmoari esker, ikastetxeetan aurretik ere “haien kabuz” egiten zuten lana “sistematizatu” da.

Eta bestalde, aipatu bezala, ikastetxeetara bakarrik mugatu beharrean, herri osoarekin partekatu nahi izan dute ekimena. “Herritarrak proiektura atxikituta eta ondarearen transmisioari era kolektiboan helduta, egitasmoa aberatsagoa eta emankorragoa izango da, denok garelako ondarearen jasotzaile eta transmititzaile”, dio partaidetza zinegotzi Anik Zubizarretak.

Hamasei unitate didaktiko

2018an Euskaltzaleen topaguneari esleitu zitzaion proiektua dinamizatzeko ardura. Ordutik, Lehen Hezkuntzan erabiltzeko hamasei unitate didaktiko sortu dituzte, eta ikastetxe eta herritar guztien eskura daude hurretik.eus blogean. Topaguneko ordezkariaren esanetan, unitateak “malguak” eta “sormenean oinarritutakoak” dira.

Hezkuntza proiektuaren parte izango da egitasmoa, eta egunerokotasuna “aberastu” nahi dutela azpimarratu dute guztiek, eta kanpotik datozen familiei Oñati nolakoa den eta nondik datorren erakusteko “oso tresna aproposa eta erabilgarria” dela Hurretik.

Goiena Telebistak albistea egin zuen egitasmoaren inguruan.

Etiketak: