Oria ibaiaren kontra doan ibilbide hau ez da ez luzea ez motza. Laua da eta erraz egin daiteke haur txikiekin zein irisgarritasun neurriak behar dituen edozeinekin. Zabala da eta oinezkoentzakoa. Arazorik ez, beraz, zirkulazioarekin.

Orioko herriko plazatik abiatu daiteke txangoa. Kaian dauden itsasontziak ikusi eta aurrera egin ahala N-634 errepidearentzako egindako zubiaren azpitik pasako gara. Bertan hasten da Ibai-ondo ibilbidea.

Pauso lasaian ordubete inguruko paseoa egin daiteke. Eserlekuak, iturri bat eta zaborrontziak aurkituko ditugu bidean. Polita da ibai baten ertzetik joatea eta neska-mutikoekin bagoaz beti da interesgarria lotuta dauden txalupen tamaina eta nolakotasuna ikustea, uretan ageri den arrainen joan-etorriak zaintzea edo lehiatzea nork botatako harriak egin salto gehiago lur azalean ertzetik botata.

Pasealekuak amaiera du. Bertara iritsitakoan bide beretik egin beharko da buelta. Erdibide inguruan Anibar portuko pista leku interesgarria izan daiteke atseden txiki bat egiteko. Ping pong mahaia eta jolas anitzetarako kantxa ditu. Baita ere mahai bat eta aparkalekua.

Gozatu! Oriok gainera leku eder asko ditu egun pasa ederra egiteko.