Galtzagorri Elkartearen webgunean berrikuntzak egin zituzten urte berriari ekiteko., Ezinbestekoen Zerrenda berria sartu zuten. Lore Agirrezabalek egindako zerrenda izan zen, eta guraso.eus en ere eman genuen honen berri .

Asteko liburu-gomendioaren egitasmoarekin aurrera egin dute, konfinamenduan habiatutako egitasmo honen bitartez (konfinamenduan egunero argitaratu zuten gomendio bat) astero haur- eta gazte-literaturako liburu baten gomendioa sareratzen dabiltza.

Horrez gain, proiektu berria ere sortu dute webgunean: Ideien Fabrika. Ekimen berri honen inguruan hitz egiteko Miriam Luki Galtzagorri elkarteko kidea elkarrizketatu dugu.

“Fabrika erakusleiho bat izatea nahi dugu, erakusketa-lekua, zabaltzeko espazio bat eta biltzeko toki bat. Alde batetik, hasi gara euskal ikertzaile eta adituen lanak jasotzen. Bestalde, arituen irakurzaletasuna eta heziketa literarioa sustatzeko ekintzak ere jasotzen ari gara. Adituen eta arituen topalekua izan nahi du Fabrikak. Leku bat non, euskarazko haur- eta gazte-literaturarekiko jakin-mina duenak, akademiaren esparruan egiten diren ikerketen emaitzak eskuratu ahalko dituen. Leku bat, halaber, non eskola-eremuan martxan jartzen dituzten ekintzak eta egitasmoak oihartzuna eta zabalpena jasoko duten. Finean, Ideien Fabrika honek edukia eta jarduna uztartu nahi ditu. Izan ere, sinistuta gaude asko dela egiten dena eta egiten den horretan guztian fokoa jarri nahi dugu. Hasi gara fabrika elikatzen, baina zuek zarete, adituak eta arituak, benetan elikatuko duzuenak. Fabrikara ekartzeko moduko ikerketak edo ekintzak badituzue, ez egin zalantzarik eta jarri gurekin harremanetan.“

Galtzagorri elkartea