Nafarroako Bortzirietan badira makina bat xenda eta ibilbide, eta horietako bat da Igantzi herritik San Juan Xar izenarekin ezagutzen den iturriraino doana.

Bi kilometroko ibilbidea da eta 150 metroko desnibela du. Negatiboa joanerakoa eta positiboa bueltan. Bide laburra, zabala eta erraz egitekoa da. Igantzi, gainera, herri oso polita da.

Igantziko igerilekuetatik abiatuko gara. 800 m egin behar dira etxalde bateraino doan asfalto-bidetik. Han, bidea utzi, eta, ezker aldera, galtzada batetik Arantzako errepideraino (NA-4020) doan bidea hartu behar da.

Hemen bi aukera daude:

  • 1. aukera (karretera ia ez du ukitzen) harrobirantz jo eta pausu batzuen buruan ezkerretara egurrezko zubitxo batetik gorantz. Hemen seinale bat ikusiko da eta aurrera segitu behar da San Juan Xar baselizaraino.
  • 2. aukera (zati handi bat errepidean zehar doa): Arantzara doan errepidea gurutzatu (130 m), eta, ezkerrera, behera egin behar da, porlanezko bide batetik, errota zahar bateraino (landa-etxea da gaur egun). Ibai bazterretik segitu, eta Arantzako errepidea hartuko dugu berriz ere; handik 600 metrora, San Juan Xarren sarrerako arkua ikusiko dugu.

Ibilbidea PR NA 10 ibilbidean sartzen da eta Arantzaraino jarraitzeko aukera badago.

San Juan Xar

San Juan Xarren, naturalki jaiotzen eta hazten da xarma edo pago-lizarra. Iberiar penintsulan zuhaitz mota hori ez da beste inon hazten eta lekuak Erreserba Naturalaren izendapena du.

Herri-tradizioaren arabera, bestalde, San Juan Xar iturriko urek sendatzeko ahalmena dute; azaleko gaitzak eta erreakzioak, batez ere. Tradizioak dio trapu bat eraman behar dela; uretan busti, gaixotutako azala igurtzi eta trapua bertan utzi behar da.

Interes turistiko handieneko tokia da. Latsa erreka pasatzen da bertatik, eta leize batean kapera bat dago. Hango debozio paganoaren erakusgarri da artzain bat irudikatzen duen eskultura erraldoia.

Argazkiak: Igantziko Udala, Joan eta Google maps.