Hiruki larroxa kooperatibako kideek argian argitaratutako artikulua dakargu gaurkoan guraso.eus egitasmora. Gure, ikasle, seme-alaben jarrera antifeministen oinarriak ulertzeko gakoan bila dabiltza eragile ezberdinak.

Ikastetxeetako ikasgelak, tamalez, espazio gatazkatsuak izaten dira askotan eta, gatazka gehienetan gertatzen den moduan, emozio intentsuak eta minak izaten dira. 2022an, ikastetxeetan aritzen diren beste eragile batzuekin batera, azken urteetan ikasgela askotan bizirik dagoen gatazka baten inguruko hausnarketa-prozesu bat abiatu genuen. Alegia, “Mutil Gazteekin Feminismotik Esku Hartzen” prozesua, gehienbat mutilen artean (eta irakasleen artean) nahiko presente dagoen jarrera antifeminista eta horren ondoriozko polarizazioa lantzeko.

Ordutik, hausnartzen eta estrategiak pentsatzen aritu gara. Eta azken urteetako barne zein kanpo hausnarketetatik, hezkuntza formal zein ez-formalean parekidetasunaren gaia (baita bestelako gatazka soziopolitikoak ere) lantzeko estrategia aldaketaren aurrean gaudela ondorioztatu dugu. Esku hartze estrategia horien nolakotasun eta zehaztasunak ez dira iritzi-artikulu honetan sartzen. Baina utziguzue begirada aldaketa eta tresna batzuk zuekin partekatzen.

Lehenik eta behin, Talde Fazilitazioaren markoa zaigu zinez interesgarria eta erabilgarria. Izan ere, marko horrek ikastaldeetan gertatzen diren momentu gorenak (akusazioak, emozio indartsuak…) taldeko sistemaren parte moduan ulertzera eramaten gaitu. Eta, ondorioz, aipatu gatazkan ageri diren rol erreakzionario horiek taldearen parte diren heinean, horiek sakonago ulertzera (eta ez isilaraztera edo zentsuratzera) eramaten gaitu. Areago, Talde Fazilitazioak ikastaldeetan gertatzen diren zenbait dinamika (adib., botere harremanak) sakonago ulertzeko tresnak ere ematen dizkigu.

Ardura kolektiboari ere garrantzia ematen zaio eta, ezinbestean, min indibidual zein kolektiboa lehengoratzeko kolektiboki lan egiten da

Bestetik, begirada errestauratiboa izango genuke; taldeetan gertatzen diren minen lehengoratzerako eta harremanen eraldaketarako bideak errazten dizkiguna. Egon daiteke begirada edo kultura hori epeltasunean edo erlatibismoan kokatzen duenik, baina posizio “neutral” horretatik urrun dago begirada hori.

Izan ere, gatazka bateko minen sortzaile diren zapalkuntza dinamiken aurrean, posizionamendu argi bat dakar; mina artatuta eta mina eragin duenari ardura eskatuta. Horrela, ardura kolektiboari ere garrantzia ematen zaio eta, ezinbestean, min indibidual zein kolektiboa lehengoratzeko kolektiboki lan egiten da; komunitatean kultura eraldaketarako oinarriak ezartzen ditu.

Guk, hemendik aurrera, ikastetxeetan eta hezkuntza ez-formaleko espazioetan gertatzen diren gatazketan esku hartzeari ekingo diogu: taldearen zauri, indar, jakituria eta ardurei tokia emanez.