Ikastetxeetan eskuko mugikorren erabilera egokia arautzeko urratsak egiten dabil Eusko Jaurlaritza, garrantzia “handiko” gai bat dela iritzita. Begoña Pedrosa Hezkuntza sailburuordearen arabera, urteak daramatzate lanketan, baina azken urrats batzuk egin dituzte. “Batetik, ikastetxeei dagoeneko gai honen inguruan bidali dizkiegu instrukzioak, jarraibideak urtea bukatu baino lehen gailu hauen erabileraren inguruko neurriak hartu beharko dituztelako, neurri pedagogikoak; bestetik, hezkuntza komunitatearen formazioa eta sentsibilizazioa. Hor jarri behar dugu azpimarra”.

Lehen Hezkuntzako, Bigarren Hezkuntzako, Batxilergoko eta Lanbide Heziketako eskolek, beraz, 2024ko amaierarako izan beharko dute zehaztuta erabilera arautzen duen protokoloa. Horretarako, prestakuntzak izango datorren astetik aurrera, eta lehen gaia pornografia izango da. Hala ere, Jaurlaritzaren hitzetan, protokoloetan argi izan beharko dute teknologiek “praktika onak” ere eskaini ditzaketela. “Hori ezin dugu ukatu. Hainbat lege ditugu erregulatuta horretarako, aukera ematen digulako hobetzeko ikasketa prozesuan eta baita dibertsifikazioan ere. Eta gure ikastetxeak buru belarri ari dira momentu honetan horretan; noski, baita ikasleen konpetentzia digitala garatzeko ere”.

Heziketan dago gakoa

Kontrara, ordea, Jaurlaritzak argi du eskuko telefonoek “eragin zuzena” dutela ikasleen garapenean eta erlazioetan, eta, beraz, garrantzitsutzat jotzen dute hezkuntza komunitate osoaren parte hartzea. “Hor bada oso sentsiblea den beste esparru bat, ikastetxeetan landu behar dena, esplizitatu eta sentsibilizazio espazioak ireki eta erregulatu. Horregatik ezinbestekoa da gailu horien erabilera egokia sustatzea”.

Bada, haien arabera, haur, nerabe eta gazteen ahotsa entzunda, heztean dago gakoa, Jaurlaritzaren laguntzarekin bada ere, ikastetxe bakoitzaren autonomia eta testuingurua aintzat hartuta, azken batea, euretako bakoitzak baitu urte amaierarako egin beharreko protokoloa osatzeko ardura.